Faboritoek kostata irabazi dute zestako Binakako Txapelketako estreinako jaialdian
Lehen multzoan Egiguren II-Ibai Erkiaga bikoteak eta bigarrenean Olharan-Txasiok irabazi zuten, baina hirugarren seta behar izan zuten, lehenengoa irabazi baino bigarrena galdu zutelako. 300 ikusle elkartu ziren Jostaldin eta ikuskizun bikainaz gozatu zurten.
Goi mailako bi partidekin hasi zen ostiralean Hondarribiko Jostaldi pilotalekuan Munduko Pilota Biltzarrak antolatutako Binakako Txapelketa, aurten lehen aldiz Jai Alai World Tour biraren barruan kokatzen dena. 300 ikusle inguru bildu ziren jaialdirako eta ondo baino hobeto pasatu zuten, pilotariek kantxan ikuskizuna eta parekotasuna erakutsi zutelako.
Txapelketa irabazteko hautagai diren bi bikote sartu ziren lehian, Egiguren II-Ibai Erkiaga lehen multzoan, eta Olharan-Txasio bigarrenean. Biek irabazi zuten, baina hirugarren seta behar izan zuten, lehen seta irabazi baino bigarrena galdu baitzuten.
Egiguren II-Ibai Erkiaga bikoteak sendo hasi zuen partida eta erraz bereganatu zuten lehen seta (15-8). Baina aurkariak berotu ziren eta bigarrena gorrientzat izan zen, Ithurria-Aldazabalentzat (12-15). Hala, berdinketa zegoen markagailua eta txapelketako lehen puntua zeinentzat izango zen erabakitzeko hirugarren seta jokatu behar izan zuten, bost tantora. Egigurenek eta Erkiagak ez zuten hutsik egin, baina nahi baino izerdi gehiago bota behar izan zuten irabazteko, gorriak 1-2 eta 2-3 aurreratu zirelako, eta 4-3aren ondoren launako berdinketa lortu zutelako. Azken tantoa urdina izan zen eta partida eta lehen multzoko behin behineko lidergoa Mikel Egiguren eta Ibai Erkiagarentzat.
Lehen partidan gertatu bezala, bigarrenean ere berdinketa haustea behar izan zen irabazlea zehazteko. Jai Alai World Tourreko Mexikoko Masters Series txapelketa irabaztetik zetozen Olharan eta Txasio bikoteak lehen seta irabazi zuen (15-13), bigarrenean Aritz Erkiaga eta Leo gehiago izan ziren (11-15), eta hirugarrena bikote faboritoarentzat izan zen (5-3).
Binakako txapelketa irabazteko hautagaietako bi dira Egiguren-Erkiaga eta Olharan-Txasio. Momentuz finalerdiak jokatzeko lehen urratsa egin dute, baina ostiralean argi geratu zenez, bikoteen arteko oreka handia da eta ezer ez dago erabakita. Hurrengo ostiralean, lehen jardunaldiko galtzaileek jokatuko dute eta irabazleek atseden hartu dezakete. Lehen multzoan, Ithurria-Aldazabal bikoteak Olha-Etchetoren kontra jokatuko du; bigarren multzoan, Arbe-Enbil bikoak egingo du debuta, Ibai Erkiaga-Leorekin.
Udako ostiral guztietan izango den bezala, partida eta partida artean marmitakoa dastatzeko aukera izan zuten ikusleek, baita Hiruzta txakolina edota Mitarte upategiko ardoa edateko ere.
