Nordic Walking ikastaroa egingo dute etzi, Bekoerrotatik abiatuta
Lehenengo aldia da Oarsoaldean Nordic Walking edo ipar martxa ikastaroa antolatzen dela. Gorputzaren goiko aldeari zein hankei eragiten diela mugitzeko era berriak esan dute antolatzaileek.
Lezoko Udalak eta Euskadiko Nordic Walking elkarteak antolatuta ipar martxa ikastaroa egingo dute etzi. Larunbatekoa lehenengo aldia izango da Oarsoaldean halako ekimena antolatzen dutela. Nordic walking edo ipar martxak hankei ez ezik, besoei eta orokorrean gorputzaren goiko alde osoari eragiten diola azaldu dute antolatzaileek, bi makilez lagunduta egiten da, ” ez ordea edozein makilekin, kirol honetan erabiltzeko sortu direnekin baizik”, gaineratu dute. Mugitzeko era berria dela ere esan dute, “atsegina, leuna eta aldi berean oso eraginkorra, giharren indarra, bihotza, koordinazioa eta mugikortasuna areagotzen dituelako”.
Bekoerrota Kiroldegian hasiko da 10:00etan eta hiru orduko iraupena izango du ikastaroak. Interesdunek berriz, aurretik eman beharko dute izena Bekoerrota Kiroldegian bertan edo 943 51 03 11 telefono zenbakira deituta parte hartu ahal izateko. 16 urtetik gorakoak izan beharko dute eta 30 euroko matrikula ordaindu. Ipar martxa egiteko behar diren bi makilak berriz, antolakuntzak utziko dizkie oparte hartzaileei.
