Karaoke herrikoiaren aurkezpenena
Hitzordu bikoitza hartuko du Behobiak bihar eta etzi. Batetik, Luis Marianoren jaiotzaren mendeurrenaren harira haren omenez antolatutako karaoke herrikoiaren lehen saioari helduko diote bihar arratsaldean, 17:00etan hasita. Mateo Vergara umoristak gidatuko du saioa. Bestetik, Andaluziako Feria egingo dute etzi larunbatarekin, goiz eta arratsaldez, auzoko gune ezberdinetan. Bi kasuetan, inguruko herritarrak erakarri eta merkataritza dinamizatzea da xedea.
Horiek horrela, abuztuaren 8ra bitartean luzatuko dira karaoke saioak. Lehena Behobian egingo dute bihar arratsaldean, eta uztailaren 25ean izan ezik, ostiralero auzo ezberdin batean egingo dutela azaldu dute gaur goizean Yon Gallardo Paperino saltokiko arduradunak eta Ainara Gimenez Chez Flamencoko ordezkariak. Hala, Behobia, San Migel, Fermin Calbeton, Pio XII eta Zabaltza plazan egingo dituzte saioak datozen asteetan. Horien artean Zabaltza plazakoa azkena izango dela aurreratu dute arduradunek.
Horrez gain, Gallardok azaldutakoaren arabera, aplikazio informatiko bat diseinatu dute eta horrek erabakiko du zein mailakoa den parte hartzailearen afinazioa eta espresio artistikoa. Maila altuena duten lagunek Zabaltza plazan egingo den azken saiorako sailkatuko dira. Edozein modutan, karaoke herrikoia dela eta ez lehiaketa oroitarazi du Gallardok.
Hala, bertan abestuko diren Luis Marianoren kantak besteak beste, ondokoak dira:
Fandango du Pays Basque,
Maite,
Aurtxoa seaskan,
Ole torero,
Mexico,
Violetas imperiales eta
Bulerias de Figaro.
Denen parte hartzearen bila
Miguel Angel Paez Merkataritza eta Garapen Ekonomikoko delegatuak gaur goizeko prentsaurrekoan parte hartu du eragile ezberdinekin batera. Hark azaldutakoaren arabera, “antolaketa merkatariek egin dute %100ean”. Gainera, erabateko “arrakasta” izan dela Mateo Vergara umoristaren parte hartzea saioen gidari gisa iritzi dio.
Kontent agertu da Paez merkatariek egindako lanarekin, eta orain sustapen kanpaina ipar Euskal Herriko komunikabideetan egingo dutela zehaztu du: “Turistak eta bizilagunak gerturatzea, ondo pasatzea, eta bide batez, merkataritza dinamizatzea dira helburu nagusiak”.
Andaluziako Feriaren aurkezpena
Behobiako merkatarien elkarteak, Eraiki Dantza Taldeak, auzo elkarteak, Alde Ilunak eta Behobia FCk Andaluziako Feria antolatu dute etzirako, goiz eta arratsaldez. Iniziatibak Irungo Udalaren sostengua jaso du.
Egitarau zabala antolatu dute eragileek Andaluziako Feria ospatzeko eta auzoa alaitzeko helburuarekin. Hortaz, erromeria, herri bazkaria, zaldiak, flamenkoa… ikusteko aukera izango dute interesatuek.
Ondokoa da eguneko egitarau osoa:
- 11:00 Taldeei harrera.
- 11:30 Erromeria auzoan.
- 13:30 Bazkari herrikoia.
- 16:00 El duende andaluz taldea.
- 16:30 Ria Pita taldea.
- 17:00 Arte Andaluz taldea.
- 17:30 Marchela eta Badin.
- 18:00 Zambra taldea.
- 18:30 Zaldi ikuskizuna.
- 19:30 Dantzatu eta amestu.
- 20:00 Embrujo Andalauz taldea.
- 20:30 Belaskoeneko Auzo Elkartea.
- 21:00 Melisa.
- 21:30 Dantzatu eta amestu: flamenko sevillanak.
- 22:00 Dantzatu eta amestu: rumba sevillanak.
