Borboidarren kontra agertu da Oiartzungo Udala
Oiartzunen eta Euskal Herrian «inongo zilegitasunik ez dutelako», borboidarren kontrako iritzia azaldu zuen atzo arratsaldean Oiartzungo Udalak. Erabaki hori udalbatzarrean hartu zuten zinegotziek, EH Bilduk aurkeztutako mozio bat medio, Juan Carlos I.aren abdikazioaren harira; eurek bakarrik egin zuten mozio horren alde, EAJ abstenitu egin zelako, eta H1eko ordezkaria gai horretan udalbatzarretik atera egin zelako, «gaia espainiarren kontua da», esan zuen.
EH Bilduko ordezkariak plenoan esan zuenez, «independentzia lortzen dugun arte, monarkiaren iraupenak eragiten digu. Francoren diktaduraren oinordekoak dira borboidarrak»
Bestalde, Garbitania Zero Zabor elkartetik atera da Oiartzun, EH Bilduren zinegotzien botoek hala erabakita. Hasiera batean eta egin Oiartzuni erakunde horrek eskaintzen zizkion zerbitzuak aldatu direnez, gobernu taldeak erabakia plenora eraman zuen atzo, eta esan bezala, gobernu taldeko kideen botoekin aurrera atera zen eskaera. Jada kanpoan, Garbitaniak Oiartzuni itzuliko dio 2010ean erakundea sortu zenean herriak jarritakoa, dirutan eta materialean. Gai horretan, H1eko kideak esan zuen Garbitaniaren kudeaketa “iluna” izan dela “beti”; EAJren eledunaren ustez, ordea, “negozio kaskarra” egin du Oiartzunek erakunde horretako partaide izanagatik.
