Atxilotu bat eta 11 inputatu Udaltzaingoarekin izandako liskarrengatik, Moskun
Zazpi lagun artatu behar izan zituzten larunbat goizaldean Bidasoa Ospitalean, udaltzainek emandako kolpeen ondorioz. Lekuko batek adierazitakoaren arabera, liskarrak Kabigorri tabernaren kanpoaldean hasi ziren, bizilagun batek Udaltzaingoari deitu ondoren. Oso altu hitz egiten ari zirelako bertaratu ziren lau udaltzainak, eta gazteak identifikatzen hasi ziren. 30 bat lagun zeuden bertan eta lekukoen arabera, zenbait gaztek identifikatzeari uko egin izanagatik piztu ziren liskarrak. Azkenean gazte bat atxilo eraman zuten agenteek.
Hala, lekukoaren arabera, udaltzain batek porra luzagarria atera eta kolpeka hasi zen gazteen aurka. “Porrazoak buruan zuzenean” ematen zituztela salatu du lekukoak. Azkenean, Ertzaintza bertaratu behar izan zen liskarrak baretzera.
Behin ospitalean, zazpi lagun artatu zituzten lesio ezberdinak zituztela-eta. Atxilotutako gazteak zazpi grapa jaso zituen buruan. Horrez gain, inputatuetako batek ospitalean zegoela “irainak” jasan zituela udaltzainen aldetik salatu du. Dirudienez, ertzainek esku-hartu behar izan zuten berriz ere egoera baretze aldera.
