Inoiz baino bikote gehiago, emakumeenak barne, Oiartzungo eskuzko pasaka txapelketan
Igandean hasiko da Oiartzungo Eskuzko Pasakako III. Txapelketa. Txost da antolatzailea, eta pozik dago taldea batetik inoizko parte hartze altuena izango delako, eta bestetik lehenengoz emakumeen bikoteak izango direlako lehian. Kontzejupean jokatuko dituzte partidak.
Hiru maila daude lehiaren barruan, emakumeena, herrikoia eta Lehen Maila. Hala, horietan denera 27 bikotek izena eman dutela nabarmendu du Txost-ek —hiru emakumeenak dira, bi Amezketakoak eta bestea Oiartzungoa, Aranburu ahizpak— 2013ko 12en eta 2012ko 8en aldean. Bikoteak nagusiko oiartzuarrak diren arren, Donostia, Hernani, Larraul, Villabona, Hondarribia, Andoain, Urnieta, Errenteria-Orereta edo Amezketako kirolariak ere izango dira lehian.
Finalak uztailaren 30ean 19:00etatik aurrera—emakumeena eta herrikoien mailakoa—, eta abuztuaren 3an (13:00etan hasita) jokatuko dira. Baina haraino iritsi arte, badute bidea pilotariek, eta lehen zita igandean dute, 10:30ean hasita, Kontzejupean. Bost partida jokatuko dituzte egun horretan, hainbat mailetakoak, horrela banatuta:
- Kazabon-Etxeberria/Huegun-Xiburu
- Ondaro-Mujika/Otegi-Arzallus
- Leonet anaiak/Susperregi-Arbelaitz
- Sorondo-Orbegozo/Arruabarrena-Ezkurdia
- Perez-Arzelus/Esnal-San Sebastian
