Antzezlan batek emango dio amaiera Ikas Jolasen ikasturteari
Ikas Jolasen parte hartzen duten haurrek Zu al zara indartsuena? obra antzeztuko dute gaur, asteartez, Mendeluko Eguzki Kultur Zentroan, 18:30ean.
Ikas Jolas programako ikasturte amaierako ekitaldia egingo dute gaur Mendeluko Eguzki Kultur Zentroan, 18:30ean. Ikas Jolasen parte hartzen duten haurrek Zu al zara indartsuena? obra antzeztuko dute eta atrezzo-a, jantziak eta antzezlana burutzeko behar izan diren apainketa guztiak Hondarribiko gazte talde batek egin ditu.
Zazpi urteko ibilbidea
Zazpi urte bete ditu aurten Mendelu auzoan Ikas Jolas programak. Hondarribiko Udalako Gazteria Departamenduko Prebentzio Komunitarioko Udal Zerbitzuak kudeatzen du eta gazte boluntarioen laguntzarekin burutzen da.
Bi funtzio dituen topagune bat da Ikas Jolas. Batetik, ikasketa aretoa du, eta bertan 5-12 urte bitarteko haurrek eskolako lanak burutzen dituzte. Eta bestetik, jolasa eta kirolak bateratzen dituen esperientzia eta tailerrak antolatzen dituzte, entretenitu eta dibertitzeko aisialdi eta denbora libreko esparru batean.
