Abots Anitzek salatu du HAPOaren etxebizitza eredua krisiaren aurreko parametroetan oinarritzen dela
HAPOak jasotzen duen etxegintza ereduaren kontra azaltzen da ezker abertzaleko taldea, "Basakoko inguruan merkatu libreko 300 etxebizitza eta babes ofizialeko 600dik gora egitea" aurreikusten duelako. Dokumentoa herritarren esku jartzeko eskatu dute, helegiteak aurkezteko aukera izan dezaten.
Hondarribiko ezker abertzaleko Abots Anitz taldeak udalak maiatzeko plenoan onartutako Hiri Antolamendurako Plan Orokorra (HAPO) kritikatu du eta hainbat eskaera egin dizkio Aitor Kerejeta alkateari idatziz. Besteak beste, HAPOak jasotzen duen etxegintza ereduaren kontra azaltzen da Abots Anitz, “Basakoko inguruan merkatu libreko 300 etxebizitza eta babes ofizialeko 600dik gora egitea” aurreikusten duelako.
Ezker abertzaleko taldeak etxebizitza politika aldatu behar dela deritzo: “Herritarren beharrak hartu behar dira aintzat. Etxebizitzei buruzko beste politika bat behar dugu, benetako beharrei erantzungo diena. Plan honetan ikusten dugu etxebizitza horiek guztiak egin behar direla esateko erabili diren kalkuluak, krisia baino lehenagoko parametroak kontuan hartuta pentsatutakoak direla”.
Gainera, Abots Anitzek gaitzetsi egin du “herritarrek ez dutela aukerarik onartu den dokumentu mardul hori erraz lortzeko, irakurtzeko, hausnartzeko eta helegiteren bat jarri nahi bada bide hori hartzeko”. Horregatik, HAPOa gune publiko batean jartzeko eskatu dute, “eta gune hori ireki ondoren bakarrik kontatzeko 45 egun, hala nahi duenak helegitea jarri dezan”.
