Zinemusik, zinea eta musika
Itsas Etxean emango dute goiz eta arratsaldez, eta musika eskolako 250 ikasleek eta irakasle guztiek parte hartuko dute. Hemezortzi pelikuletako soinu bandak entzungo dira eta koreografiak eta jantziak ekitaldirako propio prestatu dituzte.
Etzirako, igandea, saio oso berezia prestatu du Hondarribiko Musika Eskolak, eskolako irakasle eta ikasle guztien parte hartzea izango duena. Orain arte ikasitako erakutsiko dute eta ezohiko modu batean egingo dute, zineari lotuz. Itsas Etxean egingo dute eta bi saio emango dituzte, bat goizez eta bestea arratsaldez. Zinemusik goiburua jarri diote ikuskizunari. Izan ere hori da egingo dutena, zineko soinu-bandak interpretatu.
Hemezortzi filmetako musika joko dute, denak ezagunak: Bizitza polita da, Lehoi erregea, Koruko mutilak, Cabaret, eta abar. Orotara, hamasei zatiz osatuta egongo da Zinemusik eta bakoitzean musikari taldea aldatuko da, baita koreografiak, jantziak, eta abar. Esan bezala, eskolako ikasle eta irakasle guztiak ariko dira, hau da, koruak, talde instrumentalak eta dantzariak igoko dira oholtzara.
“Kurtso bukaerako proiektu handia eta berezia da. Musika Eskola osoa murgildu da errepresentazio honetako prestaketan maila artistikoan nahiz musikalean. Dena guk geuk egin dugu: dekorazioa, programaren diseinua, gidoia, proiektatuko diren irudiak, joko diren musika-konponketak…”, azaldu du Arantxa Arzak zentroko zuzendariak. Azken hilabetean buru belarri aritu dira igandeko saioa prestatzen eta ikasleak oso ilusionatuta daudela aitortu du zuzendariak: “Hilabete osoa daramagu entsegu intentsibo bereziak egiten eta ikasleak oso ondo ari dira erantzuten, eta gainera, oso ilusionatuta daude eta igandea noiz iritsiko zain gogo handiarekin”.
Goizez eta arratsaldez eskainiko dute Zinemusik Itsas Etxean, 12:00etatik aurrera eta 18:00etan. Sarrera Musika Eskolan erosi ez duenak oraindik aukera du; bestela, Itsas Etxeko leihatilan salduko dituzte, emanaldi bakoitza hasi baino bi ordu lehenagotik.
