Ingurumenaren Nazioarteko Egunaren harira zenbait jarduera izango dira Ekoetxean
1972. urteaz geroztik ekainaren 5ean ospatzen da Ingurumenaren Nazioarteko Eguna. Txingudiko Ekoetxetik bat egin nahi izan dute egun honekin, “mundu guztiko ingurumenarekiko sentsibilizazioa eta ekintza bultzatzera zuzendutako ospakizuna” baita. Horren harira, zenbait ekitaldi antolatu dituzte Ekoetxean asteburuari begira.
“Txingudiko paduretatik aniztasun biologikoaren ezagueran sakontzera zuzendutako politiken eta herritarren parte hartzearen garrantzia azpimarratu nahi dugu egun honetan”, adierazi dute. Aniztasun biologikoaren ezagutzan laguntzeko eBird erremintaren nondik norakoak azalduko dituen hitzaldi bat antolatu dute. “Zientzialari, ikertzaile eta batez ere natura zaleentzako elkargune bezala jaio da eBird. Gaur egun planeta guztian erabiltzen den hegaztien ugaritasuna eta banaketaren gaineko denbora errealeko datu-basea da”, azaldu dute.
Horiek horrela, ondokoak dira asteburuan antolatutako jarduerak:
- Ekainak 6: Hegazti-populazioen jarraipena eBIRD nazioarteko plataformaren bitartez izenpeko hitzaldia Javier Ferreres eta Hector Gonzalezen eskutik, Txingudiko Ekoetxean, 19:30ean.
- Ekainak 7 eta 8: Eskulan tailerra 4-12 urte bitarteko umeentzat.
- Ekainak 8: Hezeguneen garrantzia biodibertsitatearen gordailu bezala izeneko bisita gidatua.
