
Albaceteko taldea, gol bat ospatzen atzoko partidan (Argazkia: Juan Zafrilla-ffemenino.es)
Lehen Mailara igotzeko lehen kanporaketako joaneko partida galdu zuen Albacete Fundacionen zelaian Oiartzungo nesken taldeak, 3-1. Itzuliko partida hilaren 25ean (igandean) jokatuko dute Karla Lekuonan, 12:00etan. Zaleen laguntza beharko dute herriko neskek Albaceteri aurre egiteko, baina aukerak, izan, badituzte.
Izan ere lehen zatian nagusi izan zen Albaceteko taldea. Hasieratik atzean sartu zituzten oiartzuarrak, eta 11. eta 30. minutuetan sartutako golei esker 2-0 jarri ziren aurretik Gaztela Mantxakoak; hala ere, 1-0ekoarekin aukerak izan zituen Oiartzunek partida berdintzeko. Bigarren zatiaren hasieran kanporaketan erabakior izan daitekeen gola sartu zuen Evelyn Santosek 2-1ekoa egiteko, baina hortik gutxira, Albacetek 3-1ekoa egin zuen. Partidaren amaieran Ane Etxezarretak 3-2koa sartzeko aukera garbia izan zuen, baina etxekoen atezainak geldialdia egin, eta aldea mantentzea lortu zuen.
Albaceten Oiartzungo 50 bat zale izan ziren. Bueltakoan horiek biderkatu behar dira etxekoen lana errazteko.