Afrikako emakumeen begirada jasotzen duen erakusketa abiatu du Irungo gaztelekuak
Manuel Iradier Elkarte Afrikanistak Mujeres que miran goiburuko erakusketa muntatu du Martindozenea gaztelekuko hormetan eta hilaren 28ra arte bisitatu daiteke. Erakusketak koloretako 23 argazki biltzen ditu eta Ginea Ekuatorialeko Bata hiriko zortzi emakumerekin egindako argazki-tailerraren emaitza da.
Manuel Iradier Elkarte Afrikanistak Mujeres que miran goiburuko erakusketa muntatu du Martindozenea gaztelekuko hormetan eta hilaren 28ra arte bisitatu daiteke. Atzo inauguratu zuten eta bertan izan ziren elkarteko presidenteorde Blanca Moraza eta sentsibilizazio arloko arduradun Elena Sanabria, eta Irungo Udaleko Gazteria eta Hezkuntza departamentuko zinegotzi Fernando San Martin.
Erakusketak koloretako 23 argazki biltzen ditu eta Ginea Ekuatorialeko Bata hiriko zortzi emakumerekin egindako argazki-tailerraren emaitza da. Tailerraren egitasmoak emakume afrikarraren errealitateari buruzko irudi estereotipatuekin hautsi nahi zuen eta, erakusketak erakusten duenez, helburua lortzen du, prestakuntza eta eskarmentua duten emakume langileak azaltzen baitira argazkietan.
San Martinek nabarmendu duenez, “Martindozenea Gaztelekuak beti dauka tokia herritarren eskubideak eta berdintasunaren balioa helarazi nahi duten ekimen guztientzat. Oraingoan, emakume afrikarra protagonista duen argazki-erakusketa ekarri dugu”.
Manuel Iradier Elkarte Afrikanistak Giza elkartasuna eta ingurumenarekiko errespetua bultzatzen dituen GKEa da, inongo lotura erlijio edo politikorik gabea. Gasteizen du egoitza eta XIX. Mendean sortu zen La Exploradra elkartearen nolabaiteko jarraipena da. Egun, Afrikako hiru herrialdetan lanean dihardu: Beninen, Ginea Ekuatorialen eta Kongoko Errepublika Demokratikoan.
