Musikak eta elkartasunak bat egingo dute gaur Banakon
Hiru talde eta bi DJ, horixe da Banako tabernaren elkartasun proposamena gaur gauerako (22:00). Doonloope eta Fans izango dira disko jartzaileak eta Sangre de Mono, Luz de Putas eta Patxuko Nice taldeak. Azken hauek dira, gainera, antolatzaileak. Patxuko Nice taldeko bajistaren aita gaixo dago Mexikon [mexikarra da Dufnis], gaixotasun arraro bat du, eta tratamenduan laguntzeko antolatu dute jaialdia. Sarrera 5 euroan jarri dute, eta bertatik ateratzen dutena helburu horretara bideratuko dute.
Sergio Cortazar Patxuko irundarraren proiektua da Patxuko Nice. Esne Beltzako kidea da —beste talde batzuetan ere jo izan du, tartean Joxe Ripiau edo The Solanos bandetan— eta bestelako musika jotzeko asmoz abiatu zuen Patxuko Nice. Hasiera batean reggae lasaia egiten hasi ziren, baina taldekideen ekarpenez jantzi dute hori, Ernesto Villar hondarribiarrak azaldu duenez: “Patxukok ekarpen guztiak onartzen ditu, eta pixkanaka reggaea beste erritmoekin nahastu da, rockarekin… Esne Beltzan egiten dutenetik aldentzen da Patxuko Nice”.
Aldea, diskotik zuzenera
Iaz diskoa kaleratu zuen taldeak sei abestirekin —Banakon salgai jarriko dute— eta bertan, nabarmendu dutenez, eskarmentu handiko musikariak elkartu dira taldean. Hori bai, musikariak ezagututa, diskotik zuzenera alde asko egongo dela esan daiteke hanka sartu gabe, haiekin festa ziurtatuta baitago. Izan ere, arrazoia solidarioa bada, festa handi bat antolatu nahi izan dute, eta horretarako aproposak diren beste bi talderen atea jo dute Patxuko Nicekoek: Sangre de Mono eta Luz de Putas. Eta horri bi disko jartzaile gehitzen bazaizkio, aitzakia gutxi falta da Banakoko jaialdira joateko.