Sinadura bilketa egiten ari dira hainbat guraso, udal ludoteka itxi ez dezaten
Sinadura bilketa egiten ari dira hainbat guraso, udal ludoteka itxi ez dezaten
Ludotekako erabiltzaileen hainbat guraso sinadura bilketa egiten ari dira hilaren 13az geroztik. Ludoteka ez ixteko eskatzen dute, eta herrian barrena idatziak jarri eta udaletxe parean pankarta ere zintzilikatu dute. Alkateak, bizi duen egoera ekonomiko “itogarriaren” ondorioz, ludoteka zerbitzua eskaintzen ezin zutela jarraitu jakinarazi zien uztaila amaieran ludotekako erabiltzaileei, beraiekin egindako bileran.
Uztaila amaieran gutuna jaso zutela azaldu du seme-alabak ludotekako erabiltzaile dituen Lourdes Castillok: “Bilerara deitu gintuzten uztailaren 27an, 10:00etan erabakiaren berri emateko, eta bi proposamen egiteko. Oporrak izanik, jende asko kanpoan zegoen, eta erabiltzaileren batek ez zuen gutunik jaso, beraz, guraso gutxi azaldu zen bilerara”. Une horretatik bertatik, ludoteka itxiko zuten berria berehala zabaldu zela gaineratu du Castillok: “Harrituta gelditu ginen, martxoan hainbat guraso elkartu ginelako ludoteka zerbitzua apirilean amaitu beharrean, ekainera luzatzeko eskatzeko. Alkateak ezinezkoa zela esan zigun, egoera ekonomikoa dela eta, baina ludoteka ez zutela itxiko”.
Abuztuan udalera jo zutela azaldu du Castillok, “bileran hitz egindakoa jakiteko akta eskatzera”. Alkatea oporretan zegoela eta kultura teknikaria orduan itzuli berria zela-eta akta ematerik ez zutela erantzun zieten, “hala ere, irailean beste bilera egingo genuela esan ziguten. Iraila iritsi da eta jaso duguna beste gutun bat da. Bertan bi aukera ematen dizkigu udalak, baina bata zein bestea ez ditugu egingarri ikusten”.
Ludoteka auzolanean
Ludoteka zabalik mantendu nahi dutela esan du Ainhoa Zabalo alkateak, “egoera ekonomikoak ez digu uzten, ordea, orain arte bezala funtzionatzen jarraitzen”. Uztailean egindako bileran, 43 erabiltzailetik lau guraso baino ez zirela azaldu nabarmendu du Zabalok, eta bilera hartan zein irailean helarazitako gutunean udalak bi proposamen egin dizkiela ludotekako erabiltzaileei gaineratu du. Ludotekaren gastua erabiltzaileek beregain hartzea litzateke lehena. Guztira, 17.500 euroko inbertsioa litzateke, eta orain arte gurasoek 30 euro ordaindu dituzte urtean. Proposamen horren arabera, 55 euro ordaindu beharko lituzkete hilabeteko.
Bigarren proposamena, berriz, erabiltzaileen artean elkarte bat eratu, eta auzolanean espazio ludiko hori gurasoek beraiek antolatzea da. Baldintza bakarra jarri die udalak, euskaraz aritzea. “Udalak lokala eta materiala utziko lieke, eta argia eta uraren gastua hartuko luke beregain”, argitu du Zabalok.
Uztaileko bileraz geroztik, egindako proposamenen gaineko erantzunik eta proposamen formalik ere ez dutela jaso gaineratu du Zabalok, eta udaleko ateak zabalik dituztela gogorarazi die.
Gurasoek, bere aldetik, gaur 19:00etan bilera deitu dute ludotekan bertan proposamen komun bat adosteko. Datorren astearen hasieran idatzia eta bildutako sinadurak udalean aurkeztuko dituzte, eta alkatearekin hitzordua eskatuko dutela jakinarazi dute gurasoek.
