Turistek hamar ohetik bederatzi bete dituzte abuztuan
Abuztua hilabete oso ona izan da turismo arloan lan egiten duten Hondarribiko enpresentzat. Hamar ohetik bederatzi baino gehiago bete ziren, eta kale eta ostatuetan ere antzeman zen bisitarien kopurua. Hostalaritza elkartetik iaz baino jende gehiago zenbatu zuten. Diotenez, gastua ez da hazi, baina jaitsi ere ez, eta pozik dira emaitzarekin. Tabernarientzat baino lotarako lekua eskaintzen duten enpresentzat izan ziren datu hobeagoak abuztuan. Hala, ekainean eta uztailean izandako loaldiak asko handitu ziren azken hilabeteetan. Ekainean bataz besteko okupazioa %73,5ekoa izan bazen eta uztailean %76,35ekoa, abuztuan bisitarien kopurua nabarmen hazi zen, %90etik gora izateraino. Udaletik emandako datuen arabera —ez dute Euskal Herriko lurraldetasuna aintzat hartzen— Espainiako estatuko bisitari gehienak Katalunia, Madril, Andaluzia eta Bizkaitik etorritakoak izan ziren. Hortik kanpora, Frantziako estatutik, Belgikatik, Kanadatik eta Erresuma Batutik hurbildu ziren bisitari gehienak. Noski, datu horiekin pozik ageri dira Hondarribiko ostalari gehienak. Hala, Obispo hoteletik “abuztua bikaina” izan dela onartu dute: “emaitza paregabea izan da. Batzuetan azken unera arte itxaroion behar izan dugu, eta eskaintza erakargarriak egin ditugu ere, baina horrek emaitza ona eman digu. Esaterako, Madrileko turista gutxiago izan ditugu, baina atzerritarrek bete dute hutsune hori”. Txoko Goxoa hostalean ere ez dute krisiaren eraginik pairatu. “Pozik gaude izandako hilabetearekin. Iazko emaitzak mantendu ditugu, eta Donostiako [...]
Abuztua hilabete oso ona izan da turismo arloan lan egiten duten Hondarribiko enpresentzat. Hamar ohetik bederatzi baino gehiago bete ziren, eta kale eta ostatuetan ere antzeman zen bisitarien kopurua. Hostalaritza elkartetik iaz baino jende gehiago zenbatu zuten. Diotenez, gastua ez da hazi, baina jaitsi ere ez, eta pozik dira emaitzarekin. Tabernarientzat baino lotarako lekua eskaintzen duten enpresentzat izan ziren datu hobeagoak abuztuan. Hala, ekainean eta uztailean izandako loaldiak asko handitu ziren azken hilabeteetan. Ekainean bataz besteko okupazioa %73,5ekoa izan bazen eta uztailean %76,35ekoa, abuztuan bisitarien kopurua nabarmen hazi zen, %90etik gora izateraino.
Udaletik emandako datuen arabera —ez dute Euskal Herriko lurraldetasuna aintzat hartzen— Espainiako estatuko bisitari gehienak Katalunia, Madril, Andaluzia eta Bizkaitik etorritakoak izan ziren. Hortik kanpora, Frantziako estatutik, Belgikatik, Kanadatik eta Erresuma Batutik hurbildu ziren bisitari gehienak.
Noski, datu horiekin pozik ageri dira Hondarribiko ostalari gehienak. Hala, Obispo hoteletik “abuztua bikaina” izan dela onartu dute: “emaitza paregabea izan da. Batzuetan azken unera arte itxaroion behar izan dugu, eta eskaintza erakargarriak egin ditugu ere, baina horrek emaitza ona eman digu. Esaterako, Madrileko turista gutxiago izan ditugu, baina atzerritarrek bete dute hutsune hori”.
Txoko Goxoa hostalean ere ez dute krisiaren eraginik pairatu. “Pozik gaude izandako hilabetearekin. Iazko emaitzak mantendu ditugu, eta Donostiako Aste Nagusiarekin, adibidez, gorakada bat izan dugu”, esan dute bertatik.
Eta landa etxeetan ere abuztuko datuak uztailekoak baino dezente hobeagoak izan dira. Montañeneatik beste baserri batzuetara deitu behar izan dute eskariak bideratzeko, beteta egon baita hilabete osoan. Arotzenean antzera ibili dira; hori bai, “erretserbak beste urte batzuetan baino beranduago” egin dizkietela aipatu dute.
Hondarribiko turismo arloko enpresek uste dute herriko jaietan ere bisitari eta loaldi kopuruak onak izaten jarraituko dutela.

