Musika eskolan izena emateko azken eguna da gaur
Musika eskolan izena emateko azken eguna da gaur
Gaur bukatuko da Tomas Garbizu Musika Eskolan izena emateko epea. Interesdunek goizez egin beharko dute matrikula, eta horretarako 10:15etik 14:00ak bitartean joan beharko dute musika eskolaren bulegora.
Xanti Espina arduradunak azaldutakoaren arabera, ez dute espero aldaketa handirik aurreko urteko matrikula kopuruekin alderatuta: “Aurreko urteko kopuru beretan mugituko garela aurreikusi dugu. Horren arabera, 380 haurrek izena ematea espero dugu. Hala ere, bihar [gaur] bukatuko da matrikula epea eta oraindik ez daukagu, beraz, datu zehatzik”.
Musika eskolako eskaintza, lau urtetik gorako haurrei zuzenduta dago. Musika tresna aukeratzeko adinean dauden ikasleen artean, berriz, gitarra, perkusioa, trikitrixa eta txistua dira urtero tresnarik aukeratuenak, musika eskolako arduradunak jakinarazi duenez.
Tresna autoktonoen ikastaroa
Ikasturte honetan berrikuntzik bada Tomas Garbizu Musika Eskolan. Izan ere, urrian hasita tresna autoktonoen gaineko ikastaroa eman nahi baitute bertan.
“Dultzaina, alboka, txalaparta eta panderoa lantzea dugu helburu ikastaro horren bidez . Urriaren hasieran horretan hasteko aukera izatea gustatuko litzaiguke eta orain antolatzen eta osatzen hasi behar dugu”, azaldu du Espinak.

