Alex Agirretxe Euskadiko Duatloi Txapelduna da
Alex Agirretxek beste garaipen bat eskuratu du, oraingoan Euskadiko Duatloi Txapelketan. Asteburuan jokatu dute Arrigorriagan (Bizkaia) eta atleta errenteriarrak lortu du garaipena. Lasterketa osatzeko 12 kilometro egin behar zituzten korrika, 75 kil...
Alex Agirretxek beste garaipen bat eskuratu du, oraingoan Euskadiko Duatloi Txapelketan. Asteburuan jokatu dute Arrigorriagan (Bizkaia) eta atleta errenteriarrak lortu du garaipena. Lasterketa osatzeko 12 kilometro egin behar zituzten korrika, 75 kilometro bizikletan eta azkenengo 12 kilometroak berriz ere korrika.
Agirretxek jakinarazi duenez, lehenengo kilometroak lasai hasi zituen, eta “sentsazio onekin”; izan ere, hasi eta berehala, lasterketaren buruan zegoen taldetxoarekin bat egin zuen.
Ez zitzaion gauza bera gertatu, ordea, bizikletara igotzean. Bere espezialitatea izan arren, “indarrik gabe” sentitu zela azaldu du atletak, eta gainera, hotza zeukala, tarteka euria ari baitzuen. Segituan, irabazteko hautagai nagusi batzuk aurreratu zuten, eta “krisi” momentu bat pasatu zuela esan du, “irabazteko itxaropen guztiak joaten zirela” ikusten baitzuen. Bizikletako zatiaren erdi aldera, baina, hobeto sentitzen hasi zen, eta lehenengo postuekiko aldea murriztuz joan zen.
Berriro korrika hasi zenean lehenengoa bi minutu eta erdira zuen Agirretxek, eta gainditzeko itxaropena berreskuratu zuen. Erreferentziak eman bezain laster, animatu egin zen, eta lasterketa eskuan zuela ikusi zuen. Azkenengo zazpi kilometroak lehen postuan egin zituen.
Agirretxek jakinarazi duenez, neguan hainbat lesio eta gaixotasun izan ditu, baina azkenean ongi sentiarazten hasi da.
2010ean ere Euskadiko Duatloi Txapeldun izan zen atleta errenteriarra, eta iazko maiatzean Tarragonako Ironmana irabazi zuen.
