Bi enpresa berrik egin dute bat praktikak euskaraz egiteko ekimenarekin
Ikasketak askotan euskaraz egiteko aukera izaten da, baina zer gertatzen da lan munduan sartzean? Enpresa askok gaztelaniaz funtzionatzen dutela. Hori aldatzen joateko, Don Bosco, Oarsoaldea Garapen Agentzia eta eskualdeko lau udalak Don Boscoko ikasleek praktikak euskaraz egitea sustatzen ari dira azken urteotan. Aurten ere jarraitzen dute ekimen horrekin, eta gainera, bi enpresa berri batu zaizkie. Horrenbestez, zortzi enpresetan egin ahal izango dituzte praktikak euskaraz Don Boscoko ikasleek: Errenteria-Oreretako Papresan, IDK Electronican eta Txingura burdindegian, Oiartzungo Easo Motorren, Lurauton eta Asea Brown Boverin, Irungo CAFen eta Donostiako Tecnalian. Horietan praktikak egitera hamahiru ikasle animatu dira. Atzo izenpetu zuten akordioa alde guztiek: Julen Mendoza Errenteriako alkateak, Luis Mari Carrasco Don Bosco institutuko zuzendariordeak eta Andoni Zapirain IDK enpresako kudeatzaileak, enpresa parte hartzaileen ordezkari gisa. 2009-10 ikasturtean jarri zuten martxan egitasmoa, lehen aldiz. Urte horretan praktikak euskaraz egiteko metodologia bat diseinatu zuten, eta hori aplikatzen dute egun enpresetan. Lan hori Ahize-AEK aholkularitza etxearen bidez egiten dutela jakinarazi du Irune Balentziaga Errenteriako Euskara zinegotziak. Izan ere, duela urte batzuk praktikak A eta D ereduan egiten baziren ere, ez ziren “era finkatu” batean egiten, Luis Mari Carrascoren arabera: “Ahal zen neurrian egiten ziren; euskaraz bazekiten euskaraz, eta bestela gaztelaniaz”. Proiektu horren bidez, berriz, praktikak euskaraz [...]
Ikasketak askotan euskaraz egiteko aukera izaten da, baina zer gertatzen da lan munduan sartzean? Enpresa askok gaztelaniaz funtzionatzen dutela. Hori aldatzen joateko, Don Bosco, Oarsoaldea Garapen Agentzia eta eskualdeko lau udalak Don Boscoko ikasleek praktikak euskaraz egitea sustatzen ari dira azken urteotan. Aurten ere jarraitzen dute ekimen horrekin, eta gainera, bi enpresa berri batu zaizkie.
Horrenbestez, zortzi enpresetan egin ahal izango dituzte praktikak euskaraz Don Boscoko ikasleek: Errenteria-Oreretako Papresan, IDK Electronican eta Txingura burdindegian, Oiartzungo Easo Motorren, Lurauton eta Asea Brown Boverin, Irungo CAFen eta Donostiako Tecnalian. Horietan praktikak egitera hamahiru ikasle animatu dira.
Atzo izenpetu zuten akordioa alde guztiek: Julen Mendoza Errenteriako alkateak, Luis Mari Carrasco Don Bosco institutuko zuzendariordeak eta Andoni Zapirain IDK enpresako kudeatzaileak, enpresa parte hartzaileen ordezkari gisa.
2009-10 ikasturtean jarri zuten martxan egitasmoa, lehen aldiz. Urte horretan praktikak euskaraz egiteko metodologia bat diseinatu zuten, eta hori aplikatzen dute egun enpresetan. Lan hori Ahize-AEK aholkularitza etxearen bidez egiten dutela jakinarazi du Irune Balentziaga Errenteriako Euskara zinegotziak.
Izan ere, duela urte batzuk praktikak A eta D ereduan egiten baziren ere, ez ziren “era finkatu” batean egiten, Luis Mari Carrascoren arabera: “Ahal zen neurrian egiten ziren; euskaraz bazekiten euskaraz, eta bestela gaztelaniaz”. Proiektu horren bidez, berriz, praktikak euskaraz egitea bermatzen dela zehaztu du.
Ikasleentzat garrantzitsua izan da urrats hori, “ikasketa guztiak D ereduan egin ditzaketelako”. Horiek ere halaxe ulertu dute. Igarki Mendizabalek iaz egin zituen praktikak euskaraz. Aukera horrekin lana “errazago eta lasaiago” egin duela azaldu du: “Irakasleak ere euskaldunak dira eta beste konfiantza bat ematen dizu”. Proiektu horrekin aurrera egitera animatu du, “jendeak ikus dezan euskaraz egin daitezkeela gauzak”.
Zapirainek, enpresen ikuspuntutik, ekimen hori erronkatzat hartu du. Izan ere, “praktikak egiten dituzten ikasleek maiz ikusten dute ez daukatela aukera lana euskaraz egiteko”. Horrenbestez, “euskaraz lan egin nahi duten langile berrien errealitatera egokitzeko aukera” ikusi dutela esan du. Praktiketako ikasleak hartzen dituzten enpresak ekimenarekin bat egitera deitu ditu.
Don Boscori zein enpresei eskerrak eman dizkie alkateak, eta baita ikasleei ere, “euskaraz ikasi eta lan egiteko hautua egiteagatik”. Hurrengo ikasleak ere horretara animatu ditu.
