“Kolektibitatearen ilusioaz eta desilusioaz hitz egin nahi genuen”
Gure bide galduak antzezlana taularatuko du igandean bigarrenez Errenteria-Oreretan Dejabuk, bertan estreinatu zuela ia urtebete beteko denean. Donostia Saria jaso berri dute Dejabukoek lan horrekin. Urko Redondo sariaz eta dituzten proiektu berrietaz mintzatu da Oarso Bidasoko Hitza-rekin. Donostia Saria jaso berri duzue ‘Gure bide galduak’ lanarekin. Zer suposatu du zuentzat? Oso pozik jaso dugu, ez genuelako espero gu aintzat hartzea Donostia Sarirako, eta poza handiarekin hartu dugu. Hutsetik hasi genuen lana izan da, elkarlanean, talde lanean egin duguna eta azkenean, denentzako opari moduko bat dela uste dut. Orain arte Dejabuk taularatu dituen lanetan ez dira lantalde handiak izan oholtza gainean. Honakoan ez da hala izan. Talde handian egin izan ditugu beste lan batzuk, baina egia da Dejabuk egin izan dituen lanak batez ere Ainara Gurrutxagak eta biok bideratu eta antzeztu izan ditugula. Dejabu Panpin Laborategia Ainarak eta biok kudeatzen dugu eta egia da Gure bide galduak lanean taldea handitu egin genuela. Proposamena luzatu genien eta azkenean, lan aktorial batetik abiatu den lana izan da. Sormena bost aktore eta musikari batek osatutako talde handian eman da, eta aktore lantalde hain handiarekin aritzea nahiko berria izan da. Esperientziaren gaineko balorazioa nolakoa da? Balorazioa oso positiboa da, jakina, eta prozesua bera ere ezberdina [...]
Gure bide galduak antzezlana taularatuko du igandean bigarrenez Errenteria-Oreretan Dejabuk, bertan estreinatu zuela ia urtebete beteko denean. Donostia Saria jaso berri dute Dejabukoek lan horrekin. Urko Redondo sariaz eta dituzten proiektu berrietaz mintzatu da Oarso Bidasoko Hitza-rekin.
Donostia Saria jaso berri duzue ‘Gure bide galduak’ lanarekin. Zer suposatu du zuentzat?
Oso pozik jaso dugu, ez genuelako espero gu aintzat hartzea Donostia Sarirako, eta poza handiarekin hartu dugu. Hutsetik hasi genuen lana izan da, elkarlanean, talde lanean egin duguna eta azkenean, denentzako opari moduko bat dela uste dut.
Orain arte Dejabuk taularatu dituen lanetan ez dira lantalde handiak izan oholtza gainean. Honakoan ez da hala izan.
Talde handian egin izan ditugu beste lan batzuk, baina egia da Dejabuk egin izan dituen lanak batez ere Ainara Gurrutxagak eta biok bideratu eta antzeztu izan ditugula. Dejabu Panpin Laborategia Ainarak eta biok kudeatzen dugu eta egia da Gure bide galduak lanean taldea handitu egin genuela. Proposamena luzatu genien eta azkenean, lan aktorial batetik abiatu den lana izan da. Sormena bost aktore eta musikari batek osatutako talde handian eman da, eta aktore lantalde hain handiarekin aritzea nahiko berria izan da.
Esperientziaren gaineko balorazioa nolakoa da?
Balorazioa oso positiboa da, jakina, eta prozesua bera ere ezberdina izan da. Jende gehiagorekin lan egiteak, konplexutasun handiagoz lan egitea eskatzen dizu, baina baita aberastasun handiagoarekin ere.
Nola sortu zen Gure bide galduak lanaren ideia?
70. hamarkadako Errenterian kokatuta dago lana, eta garai haietan bizi ziren aldaketa momentuetaz hitz egitea interesatzen zitzaigun. Gizartearen zati handi batek aldaketaren beharra ikusten zuen, eta Franco hil ondoren gauzak aldatuko ziren itxaropenarekin, mugimendu handiak eman ziren maila guztietan: euskararen normalizazioan, politikan, langileen mugimenduan, hezkuntzan … Kolektibitatearen ilusioaz eta gauzak aldatzeko nahi horretaz hitz egin nahi genuen, baita garai haietan eman zen ilusioaz eta desilusioaz ere.
Zer aurkituko du ikusleak?
Taldelan teatrala, entretenigarria, eta hunkigarria ere aurkituko du. Lan atsegina azken batean. Eta gozatuko duela uste dut.
Nola definituko zenuke Dejabuk egiten duen lana?
Dejabu txotxongilo edo titereen lanean ikertzeko edo sortzeko jaio zen eta modu horretan lan dexente sortu eta kolaborazio asko egin ditu. Gu, orokorrean, aktoreak gara batik bat, eta aktore lanetik edo oholtzan egiten dugun lanetik sortzen dugu. Nahiko lan teatralak sortzen ditugu eta lanak sortzen ditugunean abiapuntu dira irudia, mugimendua eta musika. Txotxongiloekin hasi ginenean bezala, gaur egun antzerkia sortzen dugunean ere titereen lengoaia presente izaten dugu. Beti gustatzen zaigu istorio bakoitzeko molde bat aurkitzea, istorio horrekin bat dihoan estetika edo lengoaia.
Errenteria-Oreretan estreinatu zenuten Gure bide galduak. Ia urtebetera, igandean bertan antzeztuko duzue berriro…
Horrela suertatu da. Proposatu digute berriro herrira ekartzea, agian Errenteriako errealitatetik abiatzen den lana izanik interesa pizten duelako.
Eta hemendik aurrera ze proiektu ditu Dejabuk?
Gure ideia orain haurrentzako beste ikuskizun bat abiatzea da, ahal badugu datorren udazkenean aurkezteko. Hala ere, oraintxe bertan, beste gauza batzurekin ari gara, udazkenean beste proiektu eta kolaborazio berriekin hasiko garelako. Helduei begira egingo dugun hurrengo lanari dagokionez, berriz, ideiak-eta baditugu esku artean, baina oraindik ez dugu ezer zehaztu horren gainean.
‘Gure bide galduak’
- Noiz: Hilaren 22a, igandea, 19:00etan.
- Non: Errenteria Hiria Kulturgunean.
- Sarrera: 9 euro sarrera arrunta eta 7 euro sarrera murriztuak.
