Apirileko Feria, Aljaraferen eskutik, etzitik hasita
Andaluziako kulturak beteko du hiru egunez Xabier Olaskoaga Plaza. Izan ere, Apirileko Feria antolatu dute bertan, etzitik hasita, bosgarren aldiz. Concha Rociera eta Aljarafe, Errenterian dauden Andaluziako bi elkarteek, txandaka antolatzen dute Apiri...
Andaluziako kulturak beteko du hiru egunez Xabier Olaskoaga Plaza. Izan ere, Apirileko Feria antolatu dute bertan, etzitik hasita, bosgarren aldiz.
Concha Rociera eta Aljarafe, Errenterian dauden Andaluziako bi elkarteek, txandaka antolatzen dute Apirileko Feria 2008az geroztik; aurten, Aljarafen txanda izango da. Azken horrek feria antolatzen duen hirugarren aldia izango da honakoa.
Andaluziako produktuak
Antolatzaileek zehaztu dutenez hainbat postu jarriko dituzte Xabier Olaskoaga plazan. Aljarafe elkarteak antolatzen duenean bertan kokatzen dute beti feria. Hala, Andaluziako produktuak dastatzeko aukera izango dute bertaratzen diren guztiek, eta antolatzaileek zehaztu dutenez, ez dira faltako urdaiazpikoa eta otarrainxkak, ezta horiek laguntzeko ardo eta rebujitoa ere.
Aljarafek herritar guztiak gonbidatu ditu ekimenean parte hartzera, eta baita dantzatzera ere “nahiz eta profesionalak ez izan”. Gogorarazi dutenez, sevillanak dira protagonista festan, eta aurten ere ez da faltako horiek dantzatzeko eta entzuteko aukera.