Itxita esnatu da Oarsoaldea
Hamarnaka langilek egin dute bat informazio piketeekin Oarsoaldean, eta goiz-goizetik enpresaz enpresa ibili dira lehenik, eta komertzioetan ondoren, greba eguna zela gogorarazteko
Hitzordua, eguna gaua zela egin dute informazio piketeek, Mamuteko aparkalekuan. Goizeko seietarako, hamar minutu aurretik hutsa zegoen aparkalekua hamarnaka autorekin betetzen hasi da. Aparkalekuaren beste aldean, Ertzaintzaren furgonetak bildutakoen mugimenduak jarraitu ditu.
Bien bitartean, Pasaia, Lezo, Oiartzun eta Errenteria-Oreretako langileak, taldetxoetan bilduta, greba orokorraren gainean hitz egiten aritu dira. Baten batek, kafe termoa eta guzti atera du. Denak elkartuta, minutu gutxiko juntadizoa egin dute goizeko plangintza antolatzeko. Seiak eta laurdenerako erabakia zuten hiru taldetan banatzea: talde batek Oiartzun aldeko enpresa guneetara jo du; bigarren batek, Lezo eta Pasaiakoetara; eta hirugarrena, berriz, Errenteria-Oreretako industriaguneetara abiatu da. Oarso bidasoko hitza-k talde horrekin batera egin du ibilbidea poligonoetatik barrena.
Hogeita hamar auto elkartu dira talde horretan, eta Mamuteko aparkalekutik aterata, bide zaharretik gora, Zamalbide ingurura jo dute. Bertan egin du lehen geldialdia informazio piketeak. Lantegi batean lanean ari direla ikusi dute. «Pertsianak itxita ditu lantegiak baina lanean ari den laguna ikusi dugu barruan, eta argiak piztuta daude», zehaztu dute piketeko kideek. Txirrina behin eta berriro jo dute, baino ez du inork atea zabaldu, ezta erantzun ere; bildutakoak «gaur greba orokorra» eta «eskirolak» oihukatzen hasi dira orduan. Autoetara itzulita, bideari ekin diote berriro, eta Txirrita-Maleo eta Egiburuberri poligonoetara jo dute.
Bietan aurkitutako irudia berbera izan da: enpresetako ate, pertsiana eta langak itxita, eta argiak itzalita, salbuespenak salbu, eta 30 autoen bozina hotsak greba orokorra zela iragartzen. Hainbat alditan gelditu da auto karabana poligonoetan lanean ari ziren enpresa pare baten aurrean. «Lantegietan grebaren aldeko emaitza izanda ere, administrazio lanak egitera etorri dira batzuk», zehaztu du piketeetan parte hartzen ari zen lagunetako batek.
Txirrita Maleo enpresagunera heltzerakoan, Ertzaintzaren furgoneta bat azaldu eta auto karabanaren atzetik ibili da. Tentsio unerik edo liskarrik ez da izan, eta normaltasun osoz ibili dira industriaguneetan aritu diren bitartean.
Papresa aurrean gosaltzen
Goiztiar ibili dira ere Papresako langileak. Horietako batzuk, gaueko lan txandatik aterata, enpresa aurrean gelditu dira, informazio piketeak egiteko. Beste lankideek mahaia jarri, eta bertan kafea eta jatekoak izan dituzte goizeko ordu txikietan lagun. Azaldu dutenez, «lantegian produkzioa geldituta dago, baina bulegora edo mantenu lanak egitera etortzen den baten bat izaten da beti. Grebaren arrazoiak azaltzeko gaude hemen».
Zortzi eta erdiak jota sartu da herri gunera auto karabana, Beraun aldetik. Komertzioetako ateak itxita, goizeko lehenengo orduetan enpresaguneetan aurkitutako irudi berbera topatu dute herri barruan, eta bertan ere apenas izan dute lanik informazio piketeek, hiruzpalau komertziotan salbu. Ordura arteko giro lasaiak, ordea, tentsioari eman dio tarte, Biteri kalean Ertzaintza piketeei oldartu zaienean. Guztira, bost zauritu izan direla eta beste lagun bat anbulantzian eraman behar izan dutela azaldu dute informazio piketeetan parte hartzen ari ziren lagunek.
Goizeko hamarrak baino lehen Foru plazan egin duten batzarrean egin du lehen balorazioa LABeko arduradun Zorion Ortigosak: «Gaurkoa [atzokoa] urte luzeetan egin den grebarik handiena izaten ari da».
Informazio piketeak Egiburuberrin
