I. mendeko erromatarren jaki biltegi bat aurkitu dute Bixeraren azpian
I. gizaldiko erromatar etxe bateko biltegia aurkitu dute San Juan plazan, Bixera eraitsi ondorengo garbiketa lanak egiten ari zirela. Obren jarraipena egiten ari ziren Arkeolaneko ikerlariek egin zuten aurkikuntza, joan zen ostiralean, eta egun horretan bertan ekin zioten indusketa lanari. Hiru metro luze eta metro eta erdiko zabalera duen jaki gordailu bat da; atzo goizera arte laurogei zentimetroko sakonera arte zuten induskatuta zonaldea. Asteartean komunikabideak deitu zituzten agertutakoa erakusteko. Bertan izan ziren Mertxe Urteaga Oiasso Erromatar Museoko zuzendaria, Cristina Laborda Obretako zinegotzia eta Arkeolan erakundeko Pia Alkain arkeologoa, indusketen arduraduna. Urteagaren esanetan, I. gizaldiko jaki biltegi bat da aurkitutakoa, data hori baino lehenagoko etxe bateko zoru azpian egongo litzatekeena. Oraindik pozik antzematen zitzaion, ezusteko handia izan zelako. Izan ere, Laborda zinegotziak argitu zuen bezala, “Bixera eraitsi eta gero arkeologia zundaketak egin zituzten, baina ez zuten ezer ere aurkitu. Hala ere, bertan jarraitu zuten lan egiten, badaezpada”. Aurkikuntza, lurrak mugitzeko fasea amaitzen ari zirenean izan zen. Alkainek ere “ezustekoa” hartu zuen: “Gure lana ostiralean bertan amaitzeko asmoa genuen, eta ez genuen uste ezer aurkituko genuenik. Badakigu erromatarren garaian hemen etxeak bazirela, baina hainbeste aldiz eraitsi eta eraiki dute bertan, zaila zela erromatarren aztarnekin topo egitea”. Alkainek biltegian azaldutako piezak aurkeztu zituen: [...]
I. gizaldiko erromatar etxe bateko biltegia aurkitu dute San Juan plazan, Bixera eraitsi ondorengo garbiketa lanak egiten ari zirela. Obren jarraipena egiten ari ziren Arkeolaneko ikerlariek egin zuten aurkikuntza, joan zen ostiralean, eta egun horretan bertan ekin zioten indusketa lanari. Hiru metro luze eta metro eta erdiko zabalera duen jaki gordailu bat da; atzo goizera arte laurogei zentimetroko sakonera arte zuten induskatuta zonaldea.
Asteartean komunikabideak deitu zituzten agertutakoa erakusteko. Bertan izan ziren Mertxe Urteaga Oiasso Erromatar Museoko zuzendaria, Cristina Laborda Obretako zinegotzia eta Arkeolan erakundeko Pia Alkain arkeologoa, indusketen arduraduna. Urteagaren esanetan, I. gizaldiko jaki biltegi bat da aurkitutakoa, data hori baino lehenagoko etxe bateko zoru azpian egongo litzatekeena. Oraindik pozik antzematen zitzaion, ezusteko handia izan zelako. Izan ere, Laborda zinegotziak argitu zuen bezala, “Bixera eraitsi eta gero arkeologia zundaketak egin zituzten, baina ez zuten ezer ere aurkitu. Hala ere, bertan jarraitu zuten lan egiten, badaezpada”. Aurkikuntza, lurrak mugitzeko fasea amaitzen ari zirenean izan zen.
Alkainek ere “ezustekoa” hartu zuen: “Gure lana ostiralean bertan amaitzeko asmoa genuen, eta ez genuen uste ezer aurkituko genuenik. Badakigu erromatarren garaian hemen etxeak bazirela, baina hainbeste aldiz eraitsi eta eraiki dute bertan, zaila zela erromatarren aztarnekin topo egitea”. Alkainek biltegian azaldutako piezak aurkeztu zituen: zenbait txanpon, anforen zatiak, sigillata zeramika motako puska nahiko handiak, eta zeramikazko luzerna dekoratu baten puskaren bat, marrazki erotikoekin.
Mertxe Urteagak ere onartu zuen “txiripaz” aurkitu zutela biltegia. “Zundaketetan ez zen ezer agertu baina makinak lurrak mugitzen ari zirela ikusi genuen, lurra ez zegoela inguruan bezain prentsatuta”. Erromatar museoko arduradunak azaldu zuenez, erromatarren eremu lauan kokatuta zegoen etxe baten jaki biltegia edo negutegia izango zen.
Xantalenetik Santiagora
2010ean San Juan plazako biribilgunean agertutako aztarnak oso baliagarriak izan ziren erromatarrek hiriko planoa nola prestatu zuten ulertzeko. “Udaletxea dagoen lekutik Fermin Calbeton kalea pasatu arte, hori guztia lurrez eta hainbat materialez bete zuten eta berdindu, eta horren gainean eraiki zituzten hiri erromatarreko kaleak”, esan zuen Urteagak.
Bere hitzetan, kale luze-luze bat zegoen, Xantalen baselizatik udaletxe ingurura igotzen zena, lautada zeharkatzen zuena, eta museoaren ezkerretik Santiago kanalera joaten zena. “I. Mendearen bigarren erdialdean izan zen hori”, gaineratu zuen.




