Hamarnaka herritarrek bat egin dute kaleratzeen aurkako manifestazioarekin
Hamarnaka herritarrek egin zuten bat larunbateko manifestazioarekin. Stop Desahucios taldeak zein 33 talde eta eragilek deitu zuten, kaleratzeen aurka eta Mari Carmen Marquezen familiarekin elkartasunean. 18:00etan abiatu zen Beraungo Pablo Sorozabal p...
Hamarnaka herritarrek egin zuten bat larunbateko manifestazioarekin. Stop Desahucios taldeak zein 33 talde eta eragilek deitu zuten, kaleratzeen aurka eta Mari Carmen Marquezen familiarekin elkartasunean.
18:00etan abiatu zen Beraungo Pablo Sorozabal plazatik martxa, eta ibilbide osoan zehar Kutxabanken aurkako oihuak eta etxebizitza eskubidearen aldekoak entzun ahal izan ziren. Manifestazioa amaituta, Gipuzkoako Stop Desahucios taldeko Iker Apilanezek manifestaziora bildu ziren herritar guztiei eskerrak eman, eta Errenterian kaleratzeen arazoa duten beste sei kasu berri aztertzen ari direla gogorarazi zuen.
Grebarekin bat egiteko deia
Kaleratzeak gelditzeak “berebiziko garrantzia” duela eta hiritarrak “zigorra pairatzen duten bakarrak” izatea ez dutela onartuko gaineratu zuen, bestalde, Apilanezek. Horren harira, etxebizitzaren arazoari behin betiko aurre egiteko eskatu zien Stop Desahucios taldeak politikoei, eta banketxe eta sustatzaileen “mesederako” izan duten jarrera aldatzeko galdegin zien.
Rafa Lorentek hartu zuen hitza ondoren, Oreretako Langabeen Batzordearen izenean. Egoera “jasanezina” dela eta irtenbide bakarra mobilizazioa dela nabarmendu zuen. Errenteriako langabeziaren gaineko datuak ere eman zituen Lorentek: “Urtarrilean 2.927 langabe zeuden herrian; gaur, 3.005 gara eta honek ez du gelditzeko itxurarik”. Hilaren 29an kalera atera eta greba orokorrarekin bat egitera deitu zituen Lorentek, azkenik, herritar guztiak, “elkarrekin gizarte hau aldatzeko”, manifestazioan parte hartu zuten hamarnaka lagunen txalo zaparrada artean.
