Ondo aritu arren, garaipenik gabe itzuli da Union etxera
Mendizorrotzako zelaian aritu zen Real Union futbol taldea larunbatean, Deportivo Alavesen kontra. Ez zuen partida txarrik egin Unionek, baina talde arabarrak sartutako bi penaltik garaipena eman zien etxekoei. Unionen hasierako hamaikakoak honako joka...
Mendizorrotzako zelaian aritu zen Real Union futbol taldea larunbatean, Deportivo Alavesen kontra. Ez zuen partida txarrik egin Unionek, baina talde arabarrak sartutako bi penaltik garaipena eman zien etxekoei.
Unionen hasierako hamaikakoak honako jokalariak atera ziren zelaira: Otermin, Gabarain, Santos, Lacruz, Ekhi, Yuri, Beobide, Barranco, Alegre, Infante eta Angulo. Gerora, bigarren zatia bukatzear zela Galan, Chuchi eta Brit sartu ziren zelaian.
Roberto Olabe entrenatzaileak hiru jokalariz osatutako defentsarekin ekin zion partidari. Hala ere, azkar asmatu zuen horri aurre egiteko bidea Alavesek, eta 23. minutuan lehen gola sartu zuen. Irungo taldeak hiru minutu beranduago lortu zuen berdinketa, Salcedo Alaveseko jokalariak, Real Unioneko jokalari ohiak, bere atean gola sartu zuelako.
Hala, atsedenaren ondoren ondo aritu ziren irundarrak, Yuriren ustezko esku batek penaltia ekarri zuen arte. Alavesek beste gol bat lortu zuen orduan, eta talde irundarrak berdinketarekin erantzun zuen berriz ere.
83. minutuan Ekhik beste penalti bat egin, eta horren ondorioz garaipena eman zion gola sartu zuen Alavesek.
