Gazte Kemena eta Orereta, Gabon Sariketako garaile
Gazte Kemena Abesbatza izan zen joan den ostiralean Galtzarabordako kiroldegian egindako Gabon Abesti Sariketako 65. ekitaldiaren Helduen Mailako irabazlea. Xabier Vesgaren zuzendaritzapean, Kuttun kantak eta Gabon doinuak abestu zituen Errenteria-Orer...
Gazte Kemena Abesbatza izan zen joan den ostiralean Galtzarabordako kiroldegian egindako Gabon Abesti Sariketako 65. ekitaldiaren Helduen Mailako irabazlea. Xabier Vesgaren zuzendaritzapean, Kuttun kantak eta Gabon doinuak abestu zituen Errenteria-Oreretako abesbatzak.
Bigarren saria ere herrian gelditu zen, Garrintzi abesbatzak lortu zuen eta.
Hirugarren postua, bestalde, Villabonako Eresargi abesbatzarentzat izan zen.
Haurren Mailan, ostiral goizean egin zuten sariketa. Urrea bikoitza izan zen, eta Helduen Mailan bezala, herrian gelditu zen, Orereta eta Orereta Txiki abesbatzek eskuratu baitzuten, puntutan berdinduta. Bigarren postua Arrasateko Goiko Balu eta Irungo Ametsa Txiki abesbatzek partekatu zuten.
Abeslari Beteranoen saioa antolatu zuten lehen aldiz Gabon Sariketaren barruan, 55 urtetik gorakoentzat. Donostiako Cum Jubilo eta Ibaeta abesbatzak aritu ziren maila horretan, biak ala biak lehiaketatik kanpo.
Guztira, Gipuzkoako sei udalerritatik heldutako hamahiru abesbatza izan ziren Ereintza elkarteak antolatutako sariketaren 65. ekitaldian.
Epaile bezala Landarbaso Abesbatzako zuzendari Iñaki Tolaretxipi; Gorka Aierbe, Hondarribiko Eskifaia Abesbatzako zuzendaria eta David Azurza Tolosako Hodei Truk abesbatzako zuzendaria aritu ziren, goizeko zein arratsaldeko saioetan.
