Euskararen Plan Estrategikoa onartu du udalbatzarrak, hamar urterako
EAJk eta EBk plana babestu dute, PSE-EEk abstentzioaren alde egin du, eta PPk kontra bozkatu du Pasaiak badu datozen hamar urterako Euskararen Plan Estrategikoa. Herenegun onartu zuen udalbatzarrak aldeko hamabi botorekin (Bildu, EAJ, eta EB), kontrako birekin (PP) eta hiru abstentzioekin (PSE-EE). Iazko azaroan ekin zion udalak Euskararen Plan Estrategikoa lantzeari. Barruti guztietan lan taldeak eratu dira, herritar euskaldunak zein erdaldunak osatutakoak, tokian tokiko egoeraren diagnostikoa egin eta horretan oinarrituta Plan Estrategikoaren lan lerroak osatzeko. Aholku Batzorde Orokorrak egingo du aurrerantzean planaren jarraipena, baita horretarako propio eratu diren arloko lan taldeek ere. Udalbatzarrak plana onartu arren, kritikak ez ziren falta izan. PPk, esaterako, ez ditu gustuko planaren erredakzioan ageri diren zenbait hitz, “beharrarekin” lotutakoak. PPren bozeramaile David Hernandezen arabera, “euskara sustatu behar da, baina bestelako terminoetan”. EBren iritziz, berriz, plana “herrena” da. Alde bozkatu arren, Xabier Pombok esan du udalak ez duela nahikoa lan egin lan taldeetara erdaldunak erakartzeko. Hizkuntza eskubideak Hizkuntza eskubideen gaiari helduta, ez zen oposizioa izan kexu agertu zen bakarra. Udalbatzarrean euskarak ia ez zuen tokirik izan. Interbentzioak euskaraz egin zituen hautetsi bakarra ere, Bilduren bozeramaile Oihane Oronoz, kexu azaldu zen: “Nik, hemen, nire burua gazteleraz hitz egitera behartuta sentitzen dut”. Udalbatzarrean gazteleraz egitea “heziketa” kontua dela [...]
EAJk eta EBk plana babestu dute, PSE-EEk abstentzioaren alde egin du, eta PPk kontra bozkatu du
Pasaiak badu datozen hamar urterako Euskararen Plan Estrategikoa. Herenegun onartu zuen udalbatzarrak aldeko hamabi botorekin (Bildu, EAJ, eta EB), kontrako birekin (PP) eta hiru abstentzioekin (PSE-EE).
Iazko azaroan ekin zion udalak Euskararen Plan Estrategikoa lantzeari. Barruti guztietan lan taldeak eratu dira, herritar euskaldunak zein erdaldunak osatutakoak, tokian tokiko egoeraren diagnostikoa egin eta horretan oinarrituta Plan Estrategikoaren lan lerroak osatzeko.
Aholku Batzorde Orokorrak egingo du aurrerantzean planaren jarraipena, baita horretarako propio eratu diren arloko lan taldeek ere.
Udalbatzarrak plana onartu arren, kritikak ez ziren falta izan. PPk, esaterako, ez ditu gustuko planaren erredakzioan ageri diren zenbait hitz, “beharrarekin” lotutakoak. PPren bozeramaile David Hernandezen arabera, “euskara sustatu behar da, baina bestelako terminoetan”.
EBren iritziz, berriz, plana “herrena” da. Alde bozkatu arren, Xabier Pombok esan du udalak ez duela nahikoa lan egin lan taldeetara erdaldunak erakartzeko.
Hizkuntza eskubideak
Hizkuntza eskubideen gaiari helduta, ez zen oposizioa izan kexu agertu zen bakarra. Udalbatzarrean euskarak ia ez zuen tokirik izan. Interbentzioak euskaraz egin zituen hautetsi bakarra ere, Bilduren bozeramaile Oihane Oronoz, kexu azaldu zen: “Nik, hemen, nire burua gazteleraz hitz egitera behartuta sentitzen dut”.
Udalbatzarrean gazteleraz egitea “heziketa” kontua dela adierazi zuen PPko Maria Garmendiak, eta EAJko Nahikari Oterminek “edukazio onekoa beti euskalduna” behar duela erantzun zion. Ika mika horren harira, PSE-EEko Izaskun Gomezek zera esan zuen: “Hainbeste plan estrategiko egin ordez, agian itzultzaileak dira irtenbidea”.
Ulian ehiza debekatuta
Eguzkik hala eskatuta, Bilduk Ulian ehiza debekatzea eskatzen duen mozioa eraman zuen udalbatzarrera, eta baita aurrera atera ere, EBren babesarekin. PPk eta EAJk kontra bozkatu zuten, eta PSE-EEk ez zuen bozketan parte hartu, udalak zentzu horretan aurrez hartutako akordioa indarrean duela argudiatuta.
Zerga ordenantzak
Datorren urtean zerga eta tasen igoera KPIra mugatzea erabaki du udalbatzarrak. Gobernu Taldearen proposamena aurrera atera zen, alkatearen kalitatezko botoarekin. “Familien egoera gehiago ez itotzearen aldeko apustua” egin dutela defendatu zuen Gobernu Taldeak.
Pasaiako udalbatzarra, San Pedroko Udal Aretoan
