Zergen eta tasen igoerak eta San Markoren mozioa, gaurko plenoan
Udal Gobernu Taldeak proposatutako zergen eta tasen %3ko igoera izango da gaurko udalbatzarrean (18:30ean) eztabaidatuko duten punturik garrantzitsuenetakoa. Horrekin batera, udalak egoera ekonomiko okerrenean daudenentzako diru laguntzak ere proposatu...
Udal Gobernu Taldeak proposatutako zergen eta tasen %3ko igoera izango da gaurko udalbatzarrean (18:30ean) eztabaidatuko duten punturik garrantzitsuenetakoa. Horrekin batera, udalak egoera ekonomiko okerrenean daudenentzako diru laguntzak ere proposatu zituen, eta horien gainean ere ariko dira. Proposamena aurkeztu zutenetik herritarrekin eta gainontzeko udal taldeekin ere bildu da udala euren iritziak jasotzeko.
Hurrengo bi puntu nabarmenenak hondakinen gainekoak izango dira, PSE-EEk aurkeztutakoak. Udal taldea iraileko udalbatzarrera eramatekoa zen mozioa, baina gai zerrendan ez zela kontuan hartu salatu zuen. Julen Mendoza alkateak argudiatu zuen Udal Gobernuari hainbat kudeaketa egiteko eskatzen zitzaiola bertan, eta horregatik txostena eskatu zuela udalak gai horren gainean dituen konpetentziak argitzeko. Gaurko gai zerrendan, ordea, biltzen da mozio hori.
Errenteriako Ezkerrak ere aurkeztu du beste mozio bat, Diru Sarrerak Bermatzeko Legearen aldaketaren kontrakoa, eta hori ere eztabaidatuko dute.
Gai zerrendak, guztira, hamabi puntu izango ditu. Horien artean nabarmendu daitezkeen beste puntuak dira udala Eresbil Fundazioko kide egitea, Biziberritzeko Plan Nagusia 2011-2014 plangintza estrategikoa onartzea eta Errenteriako Udalean Euskararen erabilera normalizazio plana (IV. Plangintzaldia 2008-2012) onartzea.
Hilabete honetan, ohi baino egun bat beranduago egingo dute plenoa, atzo jai eguna zelako.
