XX. Ulia Mendiola Ibilaldi Neurtua antolatu dute iganderako
Igandean dute urteroko hitzordua Trintxer Mendi Taldekoek, herrian bertan. Mendiola Ulia Ibilaldi Neurtua egingo dute, martxaren XX. ekitaldia, hain zuzen, eta eguraldiaren iragarpenek ez badute huts egiten, euririk behintzat ez dute izango. Hori bai, ...
Igandean dute urteroko hitzordua Trintxer Mendi Taldekoek, herrian bertan. Mendiola Ulia Ibilaldi Neurtua egingo dute, martxaren XX. ekitaldia, hain zuzen, eta eguraldiaren iragarpenek ez badute huts egiten, euririk behintzat ez dute izango.
Hori bai, herenegungo sutearen arrastoak gertutik ikusiko dituzte mendizaleek, nahiz eta suhiltzaileek bi ordu eskasean sugarrak kontrolatu zituzten.
Lau kontrol gune
Parte hartuko duten taldeek egunean bertan eman behar dute izena, Trintxerpeko Azokan, han kokatuko dutelako mendi probarako irteera eta helmuga.
Irteera 08:00etan da, eta taldeak bat, bi edo hiru mendizalez osatutakoak, minuturo irteten joango dira Azokatik bertatik.
Ibilbidean zehar lau kontrol gune jarriko dituzte, azkena helmugan. Horietako bakoitzean partaideek irteeran jasoko duten txartela zigilatu beharko dute. Ibilaldia bukatuta, 14:30ean, bazkaria izango da Trintxer elkartean, eta parte hartzaileek izena emateko unean adierazi beharko dute bazkaltzera geratuko diren edo ez.
Bazkariak hamasei euroko prezioa du, eta ibilaldi neurtuan parte hartzeko hiru euro ordaindu behar dituzte Trintxer Mendi Taldeko bazkideek, bost euro bazkide ez direnek, eta 2,5 euro, berriz, haurrek.
