Lehiakortasuna sustatzeko jardunaldia, etzi
Oarsoaldea Garapen Agentziak enpresei zuzendutako jardunaldia antolatu du etzirako, euren Oiartzungo Mamuteko bulegoetan. Bertan Compite-Enpresa Ekimenak planaren gaineko informazioa jakinaraziko dute SPRIko eta Garapen Agentziako arduradunek hitzaldi baten bitartez. 10:00etan hasiko da eta bi ordu iraungo ditu. Parte hartu nahi dutenek enpresasustapena@oarsoaldea.net helbidera bidali dezakete e-maila edo 943 49 41 29 telefono zenbakira deitu.
Compite-Enpresa Ekimenak programa Eusko Jaurlaritzako Industria, Merkataritza eta Turismo Sailak sustatu du. Enpresa Lehiakortasunaren Planaren baitan dagoen programa da eta 2010-2013 eperako antolatu dute. Enpresei lehiakortasuna garatzeko baliabideak ematen dizkiete eta egungo egoera ekonomikotik irteteko laguntza eskaintzen diete.
Euskal Autonomia Erkidegoko enpresen eskura SPRIk jartzen duen programa da Enpresa Ekimenak. Jakinarazi dutenez, “kokagune lehiakor hobea bilatzeko duten proiektuak gauzatzeko” ahalbideratzen dute programa. Helburua honela azaldu dute: “Proiektu horien bitartez, enpresen hazkuntza gaitasuna sendotzea da, laguntza ekintza pertsonalizatuen eta finantzazioaren bitartez”. Laguntza jaso ahal izateko zerbitzuen sektoreko, merkataritzako eta turismoko enpresa izan behar da.
Elkarlanean
Oarsoaldea Garapena Agentzia lankidetzan ari da SPRIrekin. Agentziaren esanetan, biharko jardunaldiaren helburua “enpresak mugiaraztea” da, helburu argiekin: “Lehiakortasunaren hezkuntza-prozesuei ekitea baita enpresen artean kooperazio-lankidetzak eta sareak sustatzea ere”.
Biharko hitzaldiaz gain, Oarsoaldeak adierazi du “eskualdeko enpresen lehiakortasunari buruzko hobekuntzaren jarraipena” egingo duela. Horrez gain, “hornitzaileen sare lehiakorrak zehazteko orduan Oarsoaldeko Sarea sustapenaren bidez lankidetzan jardungo du eta enpresetan diagnosi lehiakorrak eta hobekuntza lehiakorraren planak egitea” bultzatuko duela jakinarazi dute.
