Emakumeen Eguna dela eta, ekitaldi sorta
Asteartean Emakumeen Nazioarteko Eguna izango da, eta Errenteria-Oreretan hainbat ekitaldi antolatu dituzte ez egun horretarako bakarrik, aste osorako baizik. Datorren asterako antolatu dutenaren nondik norakoen eta adierazpen instituzionalaren berri eman zuten atzo Maite Peña Berdintasun Kontseiluko presidenteak eta Mari Mar Carrillo Emakume Saileko zinegotziak. Peñak nabarmendu zuen oraindik datuek ezberdintasun handiak daudela erakutsi arren, berdintasun eremuan azken hamarkadetan “urrats handiak” eman direla, eta horren adibide dela aste osorako prestatu duten egitaraua. Azken asteetan horretan ibili dira emakumeen parte-hartzea sustatzeko programaren barruan dauden kideak, Berdintasun Kontseilua eta Amalatz talde feminista, eta honako egitaraua atondu dute: Astelehena, hilak 7 19:30: Divorcios en matrimonios maduros; + de 50 años (Dibortzioak senar-emazte helduetan, 50 urtetik gora) hitzaldia, Reina Aretoan. Asteartea, hilak 8 17:30: Emakume Eguneko jaialdia, Galtzarabordako kiroldegian. Honako taldeekin: Euskal dantza (Agurra), Kaputxinos (Las Marines), Erdialdea (Merengea), Agustinak (Noches de Bohemia), Pontika (Bolibood), Cristina (Perdoname), Gabierrota (Sex Boom), Beraun (Mery Popins), Euskal Dantza (Tafallako jaiak eta sorgin dantza), guztiak batera (country-a). Ostirala, hilak 11 18:30: Errenteriako Berdintasun Kontseiluaren aurkezpen festa, kale kantu eta dantza jirarekin. Udaletxetik kulturgunera egingo dute ibilbidea. 19:30: Aurkezpen festa Errenteria Hiria Kulturgunean: kontseiluaren logoaren aurkezpena, Mariasun Landa sarien banaketa, musika, dantza, aperitifa… Emakunderen leloarekin, bat Egitaraua berdintasunaren alde egindako [...]
Asteartean Emakumeen Nazioarteko Eguna izango da, eta Errenteria-Oreretan hainbat ekitaldi antolatu dituzte ez egun horretarako bakarrik, aste osorako baizik. Datorren asterako antolatu dutenaren nondik norakoen eta adierazpen instituzionalaren berri eman zuten atzo Maite Peña Berdintasun Kontseiluko presidenteak eta Mari Mar Carrillo Emakume Saileko zinegotziak.
Peñak nabarmendu zuen oraindik datuek ezberdintasun handiak daudela erakutsi arren, berdintasun eremuan azken hamarkadetan “urrats handiak” eman direla, eta horren adibide dela aste osorako prestatu duten egitaraua. Azken asteetan horretan ibili dira emakumeen parte-hartzea sustatzeko programaren barruan dauden kideak, Berdintasun Kontseilua eta Amalatz talde feminista, eta honako egitaraua atondu dute:
Astelehena, hilak 7
19:30: Divorcios en matrimonios maduros; + de 50 años (Dibortzioak senar-emazte helduetan, 50 urtetik gora) hitzaldia, Reina Aretoan.
Asteartea, hilak 8
17:30: Emakume Eguneko jaialdia, Galtzarabordako kiroldegian. Honako taldeekin: Euskal dantza (Agurra), Kaputxinos (Las Marines), Erdialdea (Merengea), Agustinak (Noches de Bohemia), Pontika (Bolibood), Cristina (Perdoname), Gabierrota (Sex Boom), Beraun (Mery Popins), Euskal Dantza (Tafallako jaiak eta sorgin dantza), guztiak batera (country-a).
Ostirala, hilak 11
18:30: Errenteriako Berdintasun Kontseiluaren aurkezpen festa, kale kantu eta dantza jirarekin. Udaletxetik kulturgunera egingo dute ibilbidea.
19:30: Aurkezpen festa Errenteria Hiria Kulturgunean: kontseiluaren logoaren aurkezpena, Mariasun Landa sarien banaketa, musika, dantza, aperitifa…
Emakunderen leloarekin, bat
Egitaraua berdintasunaren alde egindako urratsen adierazle bada ere, oraindik asko dago egiteko, eta horren adierazle da Emakundek egun horretarako aukeratu duen leloa (Emakumeak aurrera). Berdintasun Kontseiluak ere bat egin du leloarekin, eta egora aldatzeko beharrezkotzat jo du emakumeek aukera izatea gizarteko eremu guztietako erabakiguneetara heltzeko.
Lan horretan, Errenteria-Oreretan egindako bi ekimen goraipatu zituen Peñak: “Batetik, duela 27 urte emakumeen parte-hartzea sustatzeko martxan jarri zen ekimena. Egun, herriko mila emakume gara programa horretan parte hartzen dugunak 11 taldetan antolatuta. Bestetik, berriagoa den Errenteriako Berdintasun Kontseilua; emakumeen eta gizonen arteko aukera berdintasunaren alde lan egin nahi duten herritar nahiz elkarteek osatzen dutena”. Azken horretan, hamabost emakumek lan egiten dutela zehaztu zuen.
Adierazpen instituzionala
Emakumeen Nazioarteko Egunaren harira ere adierazpen instituzionala atera du Errenteriako Udalak, eta horrekin bat egin dute PSE-EEk, EAJk, EBk, PPk eta Hamaikabatek. Ezker abertzaleak ez du bat egin.
Adierazpen instituzionalean zehazten dutenez, gizon eta emakumeen harreman pertsonaletan eta sozialetan botere oreka mantendu behar da: “Gizarte honek emakume gehiago behar ditu erabakiak hartzen diren arloetan, udaletan, diputazioetan, gobernuetan, unibertsitateetan, enpresetan, sindikatuetan edo patronaletan.
Horrenbestez, Udalak emakumeak boterera eramateko prozesuak babesteko konpromisoa hartu du “boterera eramatea emakumeen bakarkako eta taldeko kontzientzia hartzeko bide gisa ulertuta, modu horretan aukera izan dezaten erabaki prozesuetan, boterea gauzatzeko orduan eta eraginerako gaitasunean euren partaidetza handitzeko”. Era berean, balio aldaketak babestuko dituztela adierazi dute, “emakumeak oztoporik gabe sar daitezen gizarteko erabakitzeko esparruetara”.
