Atzo Lakaxita desmuntatu ondoren, Martindozenea eta Ospitale Zaharraren artean pasatu zuten gaua Anakako gunean zeuden bidean diren migranteek.
Atzo, Ospitale Zaharreko elkarretaratzean.
. Gainezka egin du guneak, ezin zituzten bertan egoki artatu Irungo Harrera Sareko kideek, eta eremua kentzeaz gain, Irungo Udalari konpromisoa eskatu zioten pertsona horiei irtenbide egokia emateko. 18:00etan elkarretaratzea egin zuten Ospitale Zaharraren parean, Lakaxitako eremua bertan jartzekoak ziren, kale gorrian. Alta, Irungo Udalak jakinarazi duenez, Ospitale Zaharrean 24 plaza egokituko ditu hirira etorri diren pertsonei harrera egiteko; bertan lo egiteko eta afaltzeko aukera izango dute soilik migranteek. Eguna ezingo dute han igaro. Neurria ez da nahikoa Irungo Harrera Sarearentzat.
HITZAk jakin duenez, Lakaxitan zeuden migrante gehienek Martindozenean hartu zuten aterpe atzo. 9 bat izan ziren Ospitale Zaharrera joan zirenak. Azken horiek Irunen gelditzeko asmoa dute.
Behin-behineko neurria da Irungo Udalak proposatu duena. Irtenbide azkarra. Eta horrekin ez daude ados Irungo Harrera Sareko kideak. Atzoko elkarretaratzean esan zutenez, Martindozenea da tokirik egokiena errefuxiatuak jasotzeko —bertan baldintza zehatz batzuk betetzen dituzten migranteak hartzen dituzte,. bost egunez gehienez—, “Ospitale Zaharreko neurria, Martindozenea egokitu bitartean behin-behinekoa bada, ados egon gaitezke, erdibideko erabakia da. Baina guk borrokan jarraituko dugu Martindozenean arreta integrala izan dezaten bidean diren migranteek”. Argudio hori, udalari maiz adierazitakoa dela esan zuten Harrera Sareko kideek, udala erakundeen arteko mahaian plantea zezan, Martindozenea egokitzeko behin betiko neurriak hartzeko. “Errepikatuko dugu. Ospitale Zaharreko hotzaren protokoloaren gunea zabaltzea ez da inolaz ere nahi duguna. Martindozenea egokitzea da gure helburua”. Bertan migrante denek, baldintzarik gabe, egon daitezela nahi dute.
Lakaxitan Harrera Sareak hainbat jarduera egiten zituen egunez migranteekin. Horiek Ospitale Zaharrean egiten jarraituko dutela adierazi zuten sareko kideek, “ikus gaitzatela. Ikus dezatela herritarrek zer ari den gertatzen. Udalak ikus dezala zer ari den gertatzen. Udala ez da Lakaxitara gerturatu; behin bakarrik izan ziren han, uda bukaeran. Ez dugu alarma soziala sortu nahi. Hau gertatzen ari da. Lakaxitan egiten genituen jarduera guztiak Ospitale Zaharrean egingo ditugu”.
