Mari Jose Noain: "Atenasko emakumea emaztea eta ama zen batez ere"
Atenas klasikora bidaiatuko dute historia genero ikuspuntutik berraztertzeko zikloko hirugarren hitzaldian. Safo, Aspasia, Helena, Medea... bihar entzungo diren izenetako batzuk dira.
Emeki elkarteak antolatuta, Emakumea Historiaurrean eta Antzinatean hitzaldi-zikloko hirugarrena iritsiko da bihar, asteazkena. Aurreko bietan Historiaurrea eta Antzinako Egipto aztertu eta gero, Mari Jose Noain arkeologo eta antropologo hondarribiarrak Grezia klasikoko emakumeari buruz jardungo du Puntaleko eskola zaharrean (Molla etorbidea, 1). 18:00etatik 19:30era izango da bere hizketaldia, doan, eta denentzat irekia, baita aurrekoetara joan ez direnentzat ere.
Historia genero ikuspuntua kontuan izanik aztertzea da zikloaren helburua, eta aurreko bi hitzaldien arrakasta ikusita, ondo baino hobeto asmatu dute Emekik eta Noainek. Oraingoan, Greziara bidaiatuko dute, zehatzago Atenasera, Noainek argitu duenez: “Hiri bakoitzeko ohiturak desberdinak ziren, eta informazio gehiena Atenaskoa iritsi zaigu”. Atenasko emakumea nolakoa zen galdetuta, “bere rola emaztearena eta amarena zen, besterik ez”, erantzun du antropologoak.
Baina biharko hitzaldian, emakumearen rolaz ere ariko den arren, Antzinako Grezia berezitu ziren emakumeak azaleratuko ditu Noainek: “Iritsiko zaizkigun emakume ospetsuak aipatuko ditut, Safo, Aspasia edo Hipatia”. Mitologiari ere tarte bat utziko dio, gizartea nolakoa zen ulertzeko baliagarria delako mitologia. “Mitologiak gizartea nola islatzen zuen ikusiko dugu, jainkosak, edo literaturan agertzen ziren emakumeak, Helena, Andromeda, Medea…”.
Hori guztia landuko dute bihar Emeki elkartearen egoitzan, antzinatea berrirakurtzeko hitzaldi-zikloko hirugarrenean. Laugarrena eta azkena bi aste barru izango da, eta Antzinako Erromako emakumeak izango dira protagonistak.
Ezkutuan egon diren historiako emakumeak azalaraziko ditu Noainek
Erlazionatutako edukiaHistoriaurrea eta antzinatea genero ikuspuntutik irauliz
