Irun eta Hondarribiko herritarrei bideratuta egongo da anbulantzia medikalizatu berria, eguneko 24 orduetan eta 365 egunez.
Anbulantzia medikalizatua gaurtik aurrera egongo da operatibo.
Gaurtik aurrera, bidasoarrek anbulantzia berria izango dute. Zehazki, anbulantzia medikalizatua da eta eguneko 24 orduetan eta 365 egunez operatibo egongo da.
Eusko Jaurlaritzak jakinarazi duenez, anbulantzia berriarekin eta egun dagoen bizi-euskarrikoarekin, “Osakidetzaren larrialdietako premiazko laguntzari errefortzua” emango diote. Medikalizatuarekin, Osakidetzaren Larrialdien urteko gastuak igoko dira (1.420.000 euro inguru eta 15 profesional berrien kontratazioak). Anbulantziak, Bidasoko ospitalean izango du oinarria eta Irun eta Hondarribiko osasun zentroekin koordinaturik egongo da. 77.000 pertsona gehiagori estaldura eskaintzeko baliagarria izango da. Ondorengoak dira, anbulantzia berriak izango dituen ezaugarriak:
- Arnasgailu automatikoa.
- Desfibriladorea, patologia kardiobaskularren erabilera aurreraturako materiala eta medikazioa.
- Erabilera aurreratuko materiala aire bidez.
- Paziente traumatikoa ateratzeko eta immobilizatzeko materiala.
- Oso egoera larrian dagoen pazientea artatzeko materiala.
Anbulantzia medikalizatua eskatzeko 112 edota 943 46 11 11 telefono zenbakietara jo beharko dute bidasoarrek. Gainera, Eusko Jaurlaritzak, aireko garraioa eskualdean sartzeko asmoa duela jakinarazi du. Horretarako, Irungo Udalari heliportu gisa erabiltzeko partzela bat uzteko eskatu diete.