Ideia eta iritzi guztiak ez dira errespetagarriak
Gertatu da. Ez dakit harritu gaituen ala espero genuen gertatuko zela. Kontua da ez genuela espero agian, hain gertu pasatzea. Hain hurbil eta hain azkar. Gogorra eta gordina da. Udaltzain batek, ertzain bat babestearren, gizon bat hil du Hondarribian. Buruko nahasmenduak zituen gizon bat. Adierazgarriak izan dira oso herriko alkateak egin dituen adierazpenak. Ekidin zitekeela esan du. «Koordinazio gehiago behar da gizarte eta osasun zerbitzuen artean, ez gara tresnak emateko gai izan», adierazi du. Honetara ere ez gaude ohituak. Hemen, gurean, Euskal Herrian, ohikoena baita agintari politikoek polizia, Udaltzaingoa, Ertzaintza… babestea. Beren lana edota erantzuna proportzionala izan dela entzuten dugu hamaika bider. Hori azpimarratzeko modukoa iruditu zait.
Horrez gainera, astelehen gauean gertakariaren berri ukan genuenean, pentsatu nahi dut eskualdeko kazetari oro bezala alertan jarri ginela. Deiak egin, mezuak igorri.
Nola komunikatu ere pentsatzen hasi ginen. Gure iritziz, oso garrantzitsua baita halakoak nola komunikatzen diren. Iruditeria kolektiboan, iritzi publikoan eragin handia baitu medioetan zer eta nola kontatzen den. Ez du bete lanak balio. Lerroak, minutuek, irudiek ez dute axola. Gertatu den hori bere horretan kontatzea da inporta duena. Gardenki.
Kasu honetan, Babacar Welleren inguruan kontatzen den erdiak ez du axola. Eta lerroak edota minutuak bete behar direla erabakitzen bada kasu, gaia testuingurutik ez atera.
2015. urtean haurdun nengoela ia egunero ikusten nuen Babacar Abenida zubi azpian lo. Ez dut gezurrik esango. Lehen egunetan nik ere ez nion begiratu ere egiten. Asteak pasa ahala, ordea, «egun on» esaten hasi ginen elkarri. Erditu eta, ez nuen hainbeste paseatzen. Geroztik ikusi izan nuen kalean, paseatzen. Aspaldian, ordea, ez. Ez dugu berriz ikusiko. Ez zubi azpian, ezta kalean ere.
Komunikazioaz ari garela, eta hau irakurtzen ari bazara, ohar zaitez nork nola komunikatzen duen. Eta nork dituen bere foroetan anonimotasunaren erreinutik komentario arrazista ezin latzagoak. Dena ez da zilegi.
Egia da denok dugula iritzi bat emateko eskubidea. Baina ideia eta iritzi guztiak ez dira errespetagarriak.
