'Aitzabudo' arrahasiko dugu biziaro berri bat
Urriaro-ko azken egunean, santu guztien egunaren bezperan minutu bateko isilunea, eta beharbada isilgunea ere bai, egin nahi nuke Euskal Herri osoaren alde, poesia ez baita urri urriroa-n (edo urrian), eta txoriak iparretik hegora doaz epeltasunaren bila. Eguna argi, bihotza bero, hego hemisferioko irribarrea da opari ipar hemisferioko euskaldunontzat. Denborak hegan egiten du, baina zuek beti, maitasun eta indarraren iturri. Urteen haria urrezko hari, zuen begietan beti argiari irribarre, udazkeneko lore, bihotz beroak dena eginaraz baitezake.
Urriaro-tik hazila bitarte izan dugu aukera poesia idazteko eta letra txiki batzuk irakurtzeko, eta elkarren berri izateko Urruñako Loraldiberri liburu azokan. Hurbileko topaketa horiekin eta urrutiko oroitzapenekin irribarrearen hazia erein nahi izan dugu, abenduaren hasieran Durangoko kultura infinitu bilakatzeko.
Azokaren bihotzean izan naiz, eta Durangoko kaleetan paseatu naiz jendartean. Paper usainak ireki ditu ateak, eta hitzek, txorien modura, hegan egin nahi dute nire ahotik kanpora. Gure begiradek dantzan jarri dituzte liburuen orrialdeak, eta iraganaren lekuko Euskal Herriaren historian beste orrialde bat gehitu dugu etorkizunerako. Itsasargiak argitzen du sortzaileon bidea, ekaitzaren ostean barea izan dezagun.
Azokako zarata goxoan, Hatsaren poesia eman eta hartu dugu Maiatz sartu delako abenduan. Nire pausuek erritmoa ekartzen dute, eta stand artean gorderik poemak heltzen dira nigana: herria maitatzeko era asko dagoela erraiten dit Bittor Kapanagak, eta orain dela garaia euskara azkartzeko diost Gontzal Mendibilek. Urte bakoitzak bere magia badu ere, aurten liburuek eta diskoek ekarri dute kolorea bisai honetara, eta Durango bihurtu da beste behin ere nire hitzen etxe beroa, herrimarik gabeko adiskideak inguruan.
Udazkena gibelean uzten ari gara, eta aitzabudo edo laster izanen dugu negua, amaren suaren inguruan familia elkartzeko unea edo bakarrik ene baitan sartzeko aukera. Hagitz abudo edo ziztu bizian igarotzen dira egunak, eta ohartzerako kukurrukuak kantatzen du goizean goiz gau luzea iragan dela iragartzeko. Aitzabudo izanen dugu elkartzeko aukera, liburuen usainak irekiko baititu berriro ere Hondarribiko liburu azokaren ateak Santa Luzia egunean.
Hagitz abudo (agudo) edo laster doa mundu petral hau, eta aitzabudo izanen dugu biziaro berri bat. Onentzaroren (desio onen) enborra piztuko dugu neguaren bihotzean, eta solstizioa edo neguburua ospatuko dugu itxaropentsu.
Aitzabudo beste urte baten hasieran pausatuko ditugu oinak, eta eskuak bihotzean erranen diegu maite ditugunei hitzik gabe maite ditugula. Arrahasiko ahal dugu urte berria urteen hariak etenik gabe segi dezan aitzina, eta gu sortu ginen enbor beretik sortuko ahal dira besteak!
