Gutuna: "Gaza heroikoa"
Abotsanitzeko militante batzuek gutuna bidali diote HITZAri. Juanito Sastrek, Ibai Labaienek, Joseba Garmendiak, Kotte Urtizbereak, Juanito Ortizek, Koro Lasartek eta Angel Alkainek sinatu dute.
Jarraian, Abotsanitzeko zenbait militantek idatzi duten gutuna, Palestinaren egoeraz:
“Mendekuak ondorioak izango ditu hurrengo belaunaldientzat (…) Ekialde Hurbila aldatzera goaz” esan du Netanyahuk. Hotzikara sortu zaigu gure barnean. Estatu sionistaren jakitun gara eta ezagutzen ditugu gerra asimetriko bezain bidegabe baten gehiegikeriak, Nakbaren garaitik, 1948an Herri Palestinarra beren lurretatik basatiki kanporatzen hasi zenean.
Ezin dugu ezikusiarena egin justifikatu gabeko erailketez ez eta suntsitze mehatxuarekin. Ez dugu parte hartu nahi Israel babestu eta zuritzen dutenen hipokrisian, eta kasurik onenean, biolentziaren aurka agertzen diren ekidistante joko horretan, datorren lekutik datorrela ere.
Gazako zerrendaren blokeo ankerra eta bertako ospitaleak, eskolak eta eguneroko beste beharrezko eraikinen bonbardaketa salatu nahi dugu, bai eta gure kezka azaldu mugan ematen ari den tropen konzentrazio nabarmena Israelen aldetik, laister emango den eraso baten adierazle dena. Bi milioi gazatar baino gehiago daude hiltzeko arriskuan eta beste behin, deserroetza eta erbestea pairatzera kondenatuak. AEBen Seigarren Flotaren presentzia Mediterraneo itsasoaren ekialdean pronostikorik okerrenean jartzen du Gazako herria.
alestinar herriarekin eta haien antolakundeekin lerrotzen gara, bizitzen ari diren egoera anker honetan. Aurreko borroketan erakutsitako adorea eta erresistentzia gaitasunarekin fido gara. Amaitzeko, txalotu beharrean gaude Palestinaren alde aurrera eramaten ari diren elkartasun manifestazioak, Euskal Herritik hasi eta mundu osoan zehar, gizateria borrokalari eta aurrerakoia, beste behin, batuta ikustea.Hurrengo egunetan deitzen diren Palestinaren aldeko mugimenduetan parte hartzera animatzen dizuegu.
PALESTINAR HERRIAREN GENOZIDIOARI EZ!
GAZAREKIN ELKARTASUN OSOA!
