Txinzerrek ez ditu 2027ko uraren tarifak igoko
Hondakinen tarifetan ere aldaketa gutxi izango dira; edukontzi marroia modu egokian erabiltzen dutenek 151,60 euro ordainduko dute.
Txingudiko Zerbitzuak Mankomunitateak berritasunak iragarri ditu 2027rako. Datorren urteko uraren tarifak ez du igoerarik izango; uraren tarifak orain arte bezala mantenduko dituzte bai etxeetan, bai jarduera ekonomikoetan. Ura eraginkortasun handiagoz erabiltzeko metro kubikoaren prezioa lehen tartean apalena izango da, eta kontsumo tartea handitu ahala gora egingo du. Azken urteetan, Bidasoko ur kontsumoak goranzko joera du, eta aurtengo datuek hala berresten dute.
Uraren tarifetatik bildutako dirua, 1.832.391 euro, 2027ko inbertsioetara bideratuko dituzte. Hala nola, San Migel-Anakako saneamendu sarea berritzea, Endarako urtegian obrak egitea eta Irungo erdialdeko nahiz Olaberria landa eremuko ur hornidura hobetzea. Gainera, Behobia-Gal eremuko kolektoreak berrituko dituzte.
Hondakinei dagokienez, 151,60 tarifa mantenduko dute edukiontzi marroia modu eraginkorrean erabiltzen dutenen kasuan. Gainerakoek 285,36 euro ordaindu beharko dute urtean, bilketa eta garraio kostuak handitzearen ondorioz. “Etxe jasangarriek urtean 130 euro baino gehiago aurreztuko dituzte”, azaldu dute. Alegia, eskualdeko etxeen %68k izena emanda du hondakin organikoen gaikako bilketan, hain zuzen, 36.485 etxebizitza.
2027an, zailtasun ekonomikoak dituzten etxebizitzek laguntzak izango dituzte; bereziki, diru sarrerak bermatzeko errenta jasotzen dutenek. Familia ugariek, berriz, uraren tarifa bereziak izango dituzte.
Poltsa konpostagarriak banatzeko makina berria
Poltsa konpostagarriak eskuratzeko gune berri izango dute aurrerantzean Irunen, Emigrazio eraikinean. Txinzerrek Irun eta Hondarribian gune berriak zabaltzeko makina berria jarri du, eta honekin, lau makina erabilgarri egongo dira Irunen eta Hondarribian. Emigrazio eraikinekoaz gain, HAZ bulegoaren kanpoaldeko eta Junkal kaleko Txinzerreko bulegoko makinak daude, eguneko 24 orduetan erabilgarri daude. Hondarribian, berriz, Hondartza kiroldegiko atarian dago, eta kiroldegia zabalik dagoen bitartean erabili daiteke. Poltsak doakoak izango dira, eta bost astetik behin eskuratu daitezke.
Emigrazio eraikineko makina berriak honako ordutegia izango du: astelehenetan eta ostegunetan, 09:15etik 13:00etara; eta astelehenetik ostiralera, arratsaldez, 16:00etatik 19:30era.


