Hondarribiko Emakumeen Ttopara Xake Txapelketaren hamargarren edizioa egin dute
Azaroaren 25aren harira antolatutako txapelketan 20 emakumek parte hartu dute; xakearen bidez emakumeen arteko topagunea sortzea du xede.
Hondarribiko Emakumeen Ttopara Xake Txapelketak hamar urte bete ditu aurten. Atzo, hilak 16, hamargarren edizioa antolatu zuten Kasino Zaharrean. Azaroaren 25aren harira antolatutako egitarauaren parte garrantzitsua da xakea, eta urteekin sendotu egin da Marlaxka Xake Taldeak antolatutako hitzordua. Aurtengo edizioan 20 emakumek parte hartu zuten, eta oraingo honetan, Josette Fontaine izan da irabazlea.
Emakumeen Ttoparak bi txapelketa antolatzen ditu urtero. Batetik, martxoaren 8an den Emakumeen Egunean; eta bestetik, kasu honetan bezala, azaroaren 25ean izango den Emakumeen Aurkako Indarkeria Ezabatzeko Nazioarteko Egunaren harira. Emakumeen arteko topaketa xakearen bidez egiteko antolatzen dute, baita parte hartzea eta berdintasuna sustatzeko ere.
Parte hartzaileek hiru txandako Suitzar sisteman jokatu dituzte partidak, jokalari bakoitzeko 10 minutuko finish erritmoan. Garaipen bakoitzeko hiru puntu lortu zituzten, berdinketetan bi puntu eta porrot bakoitzeko puntu bakarra. Josette Fontaine beste parte hartzaileei gailendu zaie, bederatzi puntu eskuratuta. Lehenengo hiruak puntutan berdinduta, Maite Iraolak eta Irati Urangak osatu dute podiuma.
Atzoko Ttopara lehiaketak ostiralean, hilak 13, Maria Goñi Oscarrek egindako hitzaldiari jarraipena eman dio. Hitzaldian, xakea, literatura, memoria historikoa eta emakumeen berdintasuna izan zituen hizketagai. Gainera, Entre damas eleberriaren xehetasunak azaldu zituen. Eleberri honek erbestea, familia-memoria, belaunaldien arteko ondarea eta xakea uztartzen ditu. Bi jarduera hauek emakumeen presentzia eta protagonismoa sustatzeko balio izan die, baita elkarteak berdintasunaren aldeko konpromisoa berresteko ere.
Marlaxka Xake Taldeak eskerrak eman dizkie parte hartzaileei, eta Emekiri zein udalari beste urte batez topaketa hau antolatzen laguntzeagatik.

