Basozaindariak egitasmoa, hegaztientzako babesleku
BSTK Basotik eta Real Sociedad fundazioek biodibertsitatea sustatzeko egitasmoaren lehen jarduna egin dute Irunen; basoan, hamabi habia kutxa jarri dituzte.
Basozaindariak egitasmoa martxan da. BSTK Basotik eta Real Sociedad fundazioek egitasmoaren lehenengo jardunaldia antolatu dute Irunen. Atzo, hilak 15, biodibertsitatea sustatzeko eta hegaztientzako babeslekuak hobetzeko 48 lagun bildu ziren Eguzkitza ikastetxean. Bertan, hamabi habia kutxa eraiki zituzten denen artean, eta behin horiek eraikita hiriko basoetara eraman zituzten hegaztiek babeslekuak eduki ditzaten.
Herritarrak Gipuzkoako basoen zaintzan eta hobekuntzan inplikatzea da egitasmoaren helburua, alegia, zuzenean parte hartzea. Tailerrean zein ibilbide gidatuan BSTK Basotik Fundazioko adituek basoaren ezaugarriak azaldu zituzten. Baso ingurunea zaintzeko eta hobetzeko beharrak aipatu zituzten, eta horiek gertutik ezagutzeko aukera izan zuten. “Oso pozgarria da ikustea herritarrek zuzenean parte hartzen dutela basoen zaintzan”, adierazi du Ainara Mugak, Real Sociedad Fundazioko proiektuen arduradunak.
Egitasmoaren lehenengo jardunaldia ingurunearekiko konpromisoa ekintza zehatz bihurtzeko lehen urratsa dela diote. Bide beretik, Jon Ander Ostolazak, BSTK Basotik Fundazioko gerenteak jarduera hauek “zehatzak eta jarraituak” izan behar direla gehitu du. “Oso pozgarria da ikustea herritarrek zuzenean parte hartzen dutela basoen zaintzan”.
Lehenengo jardunaldi honetan hamabi habia kutxa jarri dituzte, baina egitasmoak beste jardunaldi batzuk iznago ditu datozen hilabeteetan. Horietan, basoak eta ibaiertzak garbitu, erleen eta beste intsektu polinizatzaileen habitata hobetu eta zuhaitz landaketa handia egingo dute.

