Energia komunitatea sortzeko urrats gehiago Hondarribian
Gaiaren gaineko hiru informazio saio antolatu ditu udalak, baina prozesuaren muinean herritarrak daudela azaldu du udal erakundeak.
Hondarribiko energia komunitatea sortzeko prozesuak urrats berria egingo du. Hura sortzeko aukera aztertzeko hiru saio egingo dira hilaren 18an, eta abenduaren 10 nahiz 16an. Denak Itsas Etxean izango dira (18:00etan), eta saio bakoitzean arlo bat landuko dute. Garoa Lekuona Ingurumen zinegotziak azaldu du energia komunitate baten bidez energiarekin loturiko hainbat egitasmo burutu daitezkeela, “baina guztietan aipagarriena da herri mailako autokontsumo partekatuko instalazio fotovoltaikoak martxan jartzea. Hau da, herriko teilatu batean egindako instalakuntza batetik komunitateko kide diren herritar eta herriko enpresa txikiei energia berriztagarria sortu, kudeatu eta komunitateko kideen artean partekatzeko aukera ematen diena”. Eredu horrek argindarraren fakturan aurrezteko aukera eskaintzen duela zehaztu du Lekuonak, “eta aldi berean, gizarte kohesioa indartzea, ingurumena zaintzea eta herriaren subiranotasun energetikoa sendotzea ditu helburu”.
Iazko urrian egin ziren komunitatea sortzeko lehen urratsak. Orduko hartan energia komunitate baten funtzionamenduaren inguruko azalpenak, onurak eta parte hartzeko aukerak azaldu ziren, baita hainbat tailer egin ere. “Saio horiek izandako arrakasta ikusita”, esan du udalak, “aurten Hondarribiak energia kontsumo jasangarriaren bidean beste pausu berri bat emango du, herri mailako energia komunitate bat sortzeko aukera erreala izan dadin”.
Lekuonak nabarmendu du prozesuaren bultzatzaile udala bada ere, horren protagonista herritarrak direla: “Udala laguntzailea eta bultzatzailea izan daiteke, herritar interesdunei informazioa, tresnak eta ezagutza eskainiz. Baina komunitatearen sorrera herritarren borondatean eta inplikazioan oinarrituko da”. Hala, energia kontsumitzaile pasibo izatetik, kontsumitzen den energiaren gaineko erabakietan parte hartzen duten eragile aktibo izatera pasa daitezke egitasmoarekin bat egiten dutenak.
Hiru saioak
Hondarribiko energia komunitatea gorpuzteko hiru saioen (denak Itsas Etxean dira, 18:00etan) zehaztasunak eman ditu Hondarribiko Udalak. Honakoak dira:
- Hilaren 18an. Energia-komunitatea ezagutzea. Energia komunitate bat zer den, zer eredu dauden, prozesuaren egutegia eta horrek dakartzan kostuak azalduko dira. Parte hartzaileen zalantzak argitzeko tartea ere izango da.
- Abenduaren 10ean. Energia-komunitateari forma ematea. Antolatzeko aukerak eta beharrezko karguak eta funtzioak aurkeztuko dira. Komunitatean parte hartu nahi duten pertsonek elkar ezagutzeko aukera izango dute, eta izena eta logotipoa aukeratzeko proposamenak jasoko dira.
- Abenduaren 16an. Energia-komunitatea sortzea. Komunitatea eratzeko beharrezko izapideak eta aurrera begirako urratsak zehaztuko dira.
Topaketa horiek irekiak dira, eta interesa dutenek aurrez eman behar dute izena Hondarribiko Udalaren webgunearen bitartez. “Herritar guztiak gonbidatu nahi ditugu saioetan parte hartzera, iaz hasitako bideari jarraipena emateko eta Hondarribiaren etorkizun energetikoa modu kolektiboan eraikitzeko”, esan du udalak.
