Gabonetako Etxea, eguberrietako epizentroa
Eguberrietako berritasun nagusia izango da; Ikust Alaian kokatuta egongo da eta hainbat egunetan irekiko dute.
Hilabete barru Irun eguberrietan murgilduko da. Gaur, aurtengo programazioaren zertzelada bat iragarri dute: Gabonetako Etxea. Ikust Alaia espazioa hitzordurako eraldatuko dute, agertokia berezi bat prestatuz. Etxerako sarrera Karrika Nagusian egongo da. Eguberrietako pertsonaiak eta argiak izango dira protagonistak, eta A&B Shows-ek ikuskizun berezi bat antolatuko du datozen egunotarako, udalaren laguntzarekin. Aurtengo eguberrietako berritasun nagusia izango da.
“Irun Euskadiko eguberrietako hiriburua bihurtu nahi dugu”, adierazi du Cristina Laborda alkateak. Familiek zerrekin gozatzeko aukera izango dute, eta orain arte izan dute eskaintza zabalduko du. “Nortasun propioko eguberriak eraikitzen jarraitu nahi dugu, familia irundarren artean ilusioa pizten, Irun eguberrietan hiri erakargarria izan dadin”.
Gabonetako Etxearen zaindaria Gabon izango da. Harekin batera, Mister Jolas, Galtzagorri, Izartxo eta Amets egongo dira. Sarreran haurrek pasaporte bana jasoko dute, eta ibilbidean aurrera egin ahala zigiluak lortuko dituzte. Bertan, Olentzero eta Mari Domingiren mundua edota Errege Magoen kanpamentua ezagutuko dituzte, baita haurrek hainbeste maite duten jostailuen fabrika ere.
Gabonetako Etxea honako egun hauetan zabalik egongo da: abenduan, 5, 6, 7, 12, 13, 19, 20, 22, 24, 26, 27, 28, 29, 30 eta 31ean; eta urtarrilean, 2an eta 3an. Arratsaldez irekiko dute 16:30etik 19:30era; abenduaren 24an eta 31n, berriz, goizez irekiko dute, 11:30etik 13:30era. Txanda bakoitzeko, gehienez, 60 pertsona sartuko dira, hamar pertsonetako taldeetan banatuta.
Sarrerak 3 euroan eskuratu daitezke udalaren webgunean, etzitik, hilak 12, aurrera. Udalak bost sarrerako bonu berezia salgai jarriko du, 12 euroan. Sarrerek egun jakin baterako balioa izango dute, eta ordu erdiko tarte batean sartzeko. 12 urtetik beherakoek heldu batekin joan beharko dute.
