Etxebizitzaren aldeko kanpaldia egin dute Zabaltza plazan
A11ko greba orokorra girotzeko egun osoko egitaraua antolatu du Bidasoaldeko Greba Batzordeak hainbat jarduerekin.
Greba orokorrerako bost egun besterik ez dira falta. Kalean giroa nabari da: kartelak, pankartak, pintadak… Guztion ahotan daude etxebizitza eskubidearen aldeko aldarriak. Gaur, hilak 7, Bidasoaldeko Greba Batzordeak egun osoko kanpaldia antolatu du hainbat jarduerekin, Zabaltza plazan. 12:00etan hitzordua egin, eta dozenaka lagun bildu dira kioskoaren inguruan bakoitza bere kanpadendarekin. “Asteazkeneko greba orokorra prestatzeko zerbait sinbolikoa antolatu dugu”, adierazi dute.
Goiza bertso saio batekin hasi dute. Igauri Lopetegi irundarra eta Ekhiñe Zapiain lesakarra bertsotan aritu dira. Etxebizitzaren krisia oinarri, hainbat gai. jorratu dituzte ordu erdiko bertso saioan. Bertsoak hasi orduko, herritarrak plazara hurbiltzen hasi dira, baita haurrak ere. “Txiki-txikiak ikusten dira/ izkinean paperen artean/ etxe politak marraztu ahala/ haien ametsez jolasten/ eta guk greba eginen dugu/ hori ona baita izaten/ mundu pixkat hobe dezagun/ haiek disfruta dezaten”. Etxebizitzaren aldarriez gain, Irunek azkenaldian bizitzen ari den trafikoaren egoera ere oso presente izan dute bi bertsolariek.
Bertso saioa txalo artean amaitu dute. Bazkalordua heldu, eta hor jarraitu dute asteazkeneko manifestaziorako materiala prestatzen. 17:00ak bitarte, lanean ariko dira pankartak egiten, informazioa zabaltzen eta herritarrak informatzen. Materiala egiten amaitzean, 17:00etan mahainguru bat antolatuko dute. Bertsotan, mahaingurura hurbiltzeko gonbitea egin diete, “ea mahaingurura ere jendea hurbiltzen den”.
Bidasoak egun duen etxebizitzaren auziaren nondik norakoak azalduko dituzte. Gainera, etxebizitzaren auziaren harira ematen den indarkeria matxista eta Irunen berriki gertatutako kasu bat azalduko dute. Eguna ixteko, 18:00etan FUFUren kontzertua izango da Zabaltza plazan.
Asteazkenean, greba orokorraren eguna izango da. Goizean goiz, lan uzteak eta piketeak antolatuko dituzte Irunen eta Hondarribian. Ondoren, 12:30ean, Donostian manifestazioa egingo dute Pio XII plazatik abiatuta. Goizeko manifestazioak hiriburuetan badira ere, arratsaldekoak eskualdeetan egingo dituzte. Bidasoaldekoa Mendelutik hasiko da 18:00etan, eta San Juan plazara arteko bidea egingo dute, ‘Etxebizitza bermatzeko espekulazioari ez’ lelopean.
Jarraian, HITZAk goizean zehar ateratako argazki sorta:
