Bukaera onena, errekuperazioa
Lasterketa bat prestatzeko oso garrantzitsua da aurretik entrenamenduak egitea eta gorputza egokitzea. Errekuperazioa ere garrantzitsua da, eta horri buruz hitz egin du Amaia Alonso Aranburu fisioterapeutak.
Behobia lasterketa bat baino gehiago da. Hogei kilometrotan istorio eta bizipen ugari bizitzen dituzte korrikalariek, eta horietako gehienek urtetik urtera errepikatzen dute. Etzi Behobiako zuzengunea jendez beteko da goizean goizetik, milaka eta milaka korrikalarik zein ikuslek Bidasoa ibaiaren ertzak txiki utziko dituzte. Behobiatik Donostiako Bulebarrerainoko ibilbidean korrikalariek dena emango dute helmugara lehenbailehen iristeko, baina aurretik ibilbide gorabeheratsua izango dute. Batzuk, erlojuari jarraituta marka egitera aterako dira; alegia, lasterketa lehiatzera. Beste batzuentzat, ordea, publikoaren oihuak eta esku zartadak izango dira 20 kilometroetako erritmoa markatuko duten erlojua. Lasterketak lehia bada ere, herri lasterketen izaera ere badu. Gozatzeko eguna izango da igandekoa.
20 kilometro korrika ez dira egun batetik bestera egiten. Erronka handia da, eta horrek aurretiazko prestakuntza eskatzen du: entrenamendu luzeak, serieak, aldapak… Behobia ez da lasterketa laua, aldapa ugarikoa da. Aurretiazko lanari garrantzi handia ematen diote korrikalariek, baina lasterketa ez da Bulebarrean amaitzen. Prestaketa bezain garrantzitsua da errekuperazioa. Horretaz mintzatzeko Irungo Minbarik fisioterapia zentroak ateak zabaldu dizkio HITZA-ri. Bertan, Amaia Alonso Aranburu fisioterapeuta irundarrarekin egin du hitzordua. Bere txokoan artatzen ditu bezeroak. «Aste hauetan bezero gehiago izan ditut Behobia dela eta, agenda beteta daukat», adierazi du, pozik.
Mugimendu handiko egunak izan ohi dira lasterketa entzutetsu baten aurrekoak. Hala azaldu du Alonsok: «Nahiz eta azken aste hauetan lan karga zertxobait handitu, urtean zehar lan bolumenean ez dugu aldaketa askorik izan». Bezero asko lasterketaren aurretik eta ondoren gerturatzen dira Minbarik klinikara deskargak egiteko. Aurten, gainera, promozio bat prestatu du: deskargak egiteko 30 minutuko saio laburrak, eta saio horiekin bete du asteotako agenda. «Azken urteetan errekuperazioak pisu handia hartu du, eta gero eta jende gehiagok barneratu du horrek duen garrantzia zenbatekoa den. Deskargak egiteko eta gorputza lasterketaren ondoren drainatzeko datoz korrikalari ugari».
Irundarrak argi dio aurreko prestaketa bezain garrantzitsua dela errekuperazioa. «Lasterketatan kaña handia sartzen diogu gorputzari, eta gero lesiorik izan ez arren, hankak askatzeko edo halako deskargak egiteko oso baliagarria da». Lesioak aipatuta, giharretako minari buruz aipamen bat egin nahi izan du: «Uste dut denok ditugula. Giharretako mina pasa behar da, eta luzaketa suabeak egin behar ditugu hankak mugitzen». Hori ekiditeko ez dago erremedio argirik, «bakoitzaren araberakoa» dela nabarmendu du.
Errekuperazio on bat egiteko gomendioei buruz galdetuta, Alonsok zenbait aholku azaldu ditu. «Behobia aldapaz beteriko lasterketa bat da, eta artikulazioek eta zoru pelbikoak asko sufritzen dute aldapan behera. Bestalde, korrikalariari, aldapan gora doanean, bikiak eta koadrizepsak kargatzen zaizkio, eta lesioak izan ditzake», adierazi du. Horregatik, lasterketa bukatu eta berehala gorputza betetzea ezinbestekoa dela azaldu du: «Ur asko edan, ondo jan, eta noski, gutxienez, egun bateko atsedenaldi ona izan gorputza zaintzeko».
Luzaketak, noiznahi
Kirola egin baino lehen eta ondoren luzaketak egitea ezinbestekoa da. Irundarrak azken urteetan egindako ikerketen berri eman du: «Gaur egun, ikerketek diote luzaketak noiz egin baino, garrantzi handiagoa duela horiek egitea; ez noiz, baizik eta egitea. Adibidez, astelehenetan eta asteazkenetan korrika egitera bazoaz, ez du inporta asteartetan luzaketak egitea. Benetan inporta duena da luzaketak plangintzan sartzea eta momenturen batean egitea. Behobiaren ondoren ondo dator luzaketak egitea».
Alonso zoru pelbikoan espezializatutako fisioterapeuta da, eta gorputz atal hori osasuntsu mantentzeko luzaketak oso garrantzitsuak direla dio. «Zoru pelbikoak ibiltzean sortzen dugun presioa kudeatzen du. Orain dela urte batzuk ez genion bezainbesteko garrantzirik ematen. Gaur egun horren gaineko lanketa gehiago egin ditugu eta badakigu zer garrantzi duen zoru pelbikoak», azaldu du.
Zenbait lesioren jatorria zoru pelbikoan egon daitekeela zehaztu du, eta horregatik hura entzuten jakin behar dela adierazi du. «Inkontinentziaren edo minaren bestelako mila sintomak ditugunean zoru pelbikoa sufritzen ari denaren seinale da. Zoru pelbikoak korrika egiten eta errendimendu hobea edukitzen laguntzen du».
Fisioterapeutak bezeroengandik asko ikasten du. «Urtetik urtera beraien esperientziak, bizipenak edota izan dituzten lesioak kontatzen dizkidate eta horiek oso baliagarriak dira niretzat». Ondoriorik larriena datorren urteko Behobiarik gabe gelditzea dela azaldu du.
Behobia-Donostiak harentzat duen berezitasuna nabarmendu du. «Orain arte Behobia egitea ez da nire plangintzaren parte izan, baina irundarra izanik nolabaiteko lotura daukat lasterketarekin. Hemen bizi garenontzat oso berezia da lasterketa, alde batetik edo bestetik probaren giroa nabaritzen baita. Bezero askok parte hartzen dute Behobian, eta urduritasuna nabaria da kontsultan».
Hogei kilometroak egiteko dagoeneko prest daude milaka korrikalari, eta horiei animoak helarazi dizkie Alonsok. «Lasterketaz gozatu eta ondoren ondo deskantsatu, gorputza zaintzeko».
