Lapurriturrik 342 bisitari izan ditu 2026an
Aste Santuan eta ekainetik urrira zabalik egon da Lapurritarriko informazio gunea; guztira, bost jarduera antolatu dituzte ingurua ezagutzeko.
Urria bukatzearekin batera, Lapurriturriko informazio guneak ateak itxi ditu. 2026an, Aste Santuan eta ekainetik urrira zabalik egon da, guztira 50 egun. Hilabete hauetan 342 bisitari izan ditu. Aiako Harriko naturgunean kokatuta dago, eta bertako ingurua ezagutzeko bost jarduera antolatu dituzte. Jarduera horietan, 72 parte hartzaile izan dira aurten. Bisitariei dagokienez, abuztua izan da bisitari gehien jaso dituen hilabetea, hain zuzen, 129 (denboraldi guztiko %37,7).
2026. urteko balorazioa egiteko Sergio Javier Garapen Jasangarriko ordezkaria bertan izan da. “Leku hau informazio puntu bat baino askoz gehiago da. Aiako Harri osoan dauden ibilbideen eta inguruko animaliak zein landareak ezagutzeko erreferentzia bilakatu da”, adierazi du. Erlaitzeko zelaian kokatuta, “Aiako Harriaren bista ederrak ikusteko tokia bihurtu da”.
Aurtengo datuak azaltzeko bisitarien adina nabarmendu nahi izan du. 40 eta 65 urte artekoak dira Lapurriturrira gehien hurbildu direnak. 229 bisitari izan dira adin tarte horretakoak, %67a. Bestalde, jatorriaren arabera Irundik kanpoko euskal herritarrak izan dira gehiengoa, ia bisitarien erdia, %46,5a (159 bisitari).
“Familian gozatzeko gunea da Lapurriturri”, gaineratu du Javierrek. Irekita egon den egunetan, informazio puntuak doako irteerak antolatu ditu ingurunea ezagutzeko. Familientzako jarduerak izan dira, eta gai asko jorratzeko aukera izan dute: mineralak, polinizatzaileak edo inguruko zuhaitzak. Aurten, gainera, bisitariei bertako hegaztien informazio fitxa banatu diete.
Informazio puntua egon arren, irundar ugari hurbiltzen dira Lapurriturrira bistaz gozatzea eta menditik barrena ibiltzea.
