Autobus zerbitzua hobetzearen alde egin du EAJk
Iraileko osoko bilkuran autobus zerbitzuaren aldaketen aurrean kexu agertu zen EAJ. Orain, udalari galdetzen dio ea onartutako eskaera jada mugikortasun sailaren eskuetan dagoen.
Ekialdebuseko aldaketek Bidasoa eskualdea hankaz gora jarri dute azken asteetan. Herri mugimenduek, auzo elkarteek eta alderdi politikoek haien ezinegona erakutsi dute, eta kexu agertu dira Azahara Dominguezek bideratutako mugikortasun sailak hartutako erabakiaren aurrean. Orain, Hondarribiko EAJk hartu du hitza, eta autobus zerbitzua hobetzeko “premiazko neurriak” eskatu ditu.
Jeltzaleek azaldu dute lehentasuna eman behar zaiela atera diren kexu guztiei, bereziki autobus zerbitzua egunero erabiltzen dutenen iradokizunei. Iraileko osoko bilkuran puntu bat autobusen aferari eskaini zieten, EH Bilduk eta EAJk bultzaturiko mozio baten bidez. Bertan, Donostia eta Hondarribia zuzenean lotzen dituen autobusaren maiztasuna ez murriztea eta Hondarribia eta Irun artekoa lehen bezala mantentzea eskatu zuten bi alderdiek. Mozioa onartu egin zen, eta horren aurrean, EAJk galdera bat planteatu dio udal gobernuari: “Udalak bidali al dio dagoeneko Mugikortasun Sailari osoko bilkuran onartutako eskaera?”.
Autobusen aldaketa iragarri zenean, Dominguez Igor Enparanekin batera agertu zen albistea ematen, aurrera pauso bat zela esanez. EAJk dio alkatearen jarrera publikoa auzitan jartzen duela. “Erabiltzaileak izaten ari diren zailtasunak ikusita, galdera bat sortzen da: zer ari zen ospatzen alkatea argazki haietan?”, galdetu du talde jeltzaleak.
“Garraio publikoa pertsonen bizimodura egokitu behar da, eta ez alderantziz. Horregatik, talde jeltzaleak azpimarratu du beharrezkoa dela langileek, ikasleek eta herritar guztiek eguneroko joan-etorriak berme osoz egin ahal izateko ordutegiak eta maiztasunak bermatzea”, gehitu du EAJk.
