Udalak proposatu du 2027rako udal zergak izoztea eta OHZren gaineko onura gehiago ematea
Irungo Udalak udal araudia eguneratzeko prozesuaren barruan mahaigaineratu du ordenantza fiskalaren aldaketa. OHZren onuradun berrien artean egongo lirateke indarkeria matxista jasan duten familiaburuak edo egoera zaurgarrian daudenak.
Irungo Udalak proposatu du egun indarrean dauden zerga eta tasak izoztea eta ez handitzea datorren urteari begira. Era berean, udal ordenantza fiskala aldatu eta foru araudi berrira egokitzea planteatu du, ondasun higiezinen gaineko zergaren gaineko hobari gehiago emateko, eta hala, herritar gehiagok jaso ahal izateko onura hori.
Udaleko lehenengo alkateorde eta Ogasuneko ordezkari Nuria Alzagaren arabera, “kudeaketa arduratsuari esker, aurreikusitakoa baino gehiago” bildu da orain arte. “Kudeaketa arduratsua da, besteak beste, jakitea noiz ez den beharrezkoa herritarrei ahalegin ekonomiko gehigarria egin dezaten eskatzea. Horregatik, behin udalaren egoera ekonomikoa aztertuta, arduratsuena zerga izozketa proposatzea dela iruditzen zaigu”, esan du.
OHZ ondasun higiezinen gaineko zergari dagokionez, hobari edo onura gehiago ematea proposatu du, 1/2026 Foru Arauari jarraiki. Orain arte familia ugariei bakarrik ematen zitzaien gehigarria, baina orain, guraso bakarreko familiek, etxeko indarkeria edo indarkeria matxista jasan eta familiaburu direnek eta zaurgarritasun egoeran daudenek ere jaso ahalko lukete.
Hobaria pertsona edo familia bakoitzaren diru sarreren araberakoa izango litzateke, kontuan hartuta bakoitzaren ezaugarriak eta gaitasun ekonomikoa. Bestalde, katastroan gehienez ere etxebizitzaren balioa 300.000 euroa dutenei aplikatuko zaie, kontuan izan gabe garajea, trastelekua edo bestelako eranskinak.
Orain arte hobaria jasotzen zutenek bere horretan jasotzen jarraituko dute amaierako epera arte. Araudi berria eskera berriei eta luzapenei aplikatuko zaie. Dena den, honakoa behin-behineko da, udalak 2027ko udal araudia eguneratzeko prozesuaren barruan ordenantza fiskala aldatzeko proposamena, hain zuzen.
