Gobernuz Kanpoko Erakundeen lana, argitara
21 erakundek giza eskubideen babesaren alde egindako lana eta haien jarduerak erakutsiko dituzte igande goizean Urdanibia plazan egingo den azokan.
Irungo Udalak Irun Munduarekin Lankidetzan azoka antolatu du beste urte batez. Igandean izango da, urriaren 18an, Urdanibia plazan, 11:00etatik 13:30eara. Azokan Garapenerako Gobernuz Kanpoko 21 Erakundek parte hartuko dute. Jarduera ezberdinen bitartez, erakundeek garapenerako lankidetzaren eta hezkuntzaren, eta giza eskubideen babesaren alde egindako lana ezagutaraziko dituzte.
Erakundeek beraien proiektuak aurkeztu eta herritarrek informazioa jasotzeko aukera izango da igandekoa. Azokaren helburua elkarkidetza, pentsamendu kritikoa eta konpromisoa sustatzea da, mundu justuago bat eraikitze aldera. “Mota honetako jarduerak funtsezkoak dira nazioarteko lankidetza gure eguneroko bizitzara gerturatzeko, elkarkidetza sustatzeko, eta, batez ere, gogorarazteko Irunen bertan ere mundu berdinzaleago bat eraikitzen lagundu dezakegula”, adierazi du Gorka Álvarez ordezkariak. Era berean, egitasmoak komunitate zaurgarrienen alde egiten duten elkarteak nabarmendu nahi ditu.
Elkarteen jarduna erakusteaz gain, jarduera dinamikoak ere izango dira. Adibidez, Nikaraguako txokolatea eta produktuak dastatu ahal izango dira, txapak egin eta arropa birziklatu, Kolonbiako Lina Ortega muralgilearen pintura tailerran parte hartu edota proiektuen inguruko proiekzioak ikusi.
Honako hauek izango dira bertaratuko diren erakundeak: Behar-Bidasoa, DOA, Tadamum, PROYDE-PROEGA, FISC Solidaridad Internacional, ICLI, BLB/ACPP (Asamblea de Cooperación por la Paz), Asociación J.A. Freytter, Derandein, ADECO, Agua de Coco, Emigrados Sin Fronteras, Salvamento Marítimo Humanitario, Haurralde Fundazioa, Asociación para la Cooperación Internacional, Más Mujeres, Ayudemos a un Niño, TAU, Etiopía Utopía Fundazioa, Red de Sostenibilidad y Lucha contra la Pobreza eta Chiapas Enea.
Azokatik kanpo ere, ekintzak
Igandean da zita, baina aurretik eta ondoren beste bi jarduera prestatu dituzte. Alde batetik, gaur, ostirala urriak 16, Los 300, memoria y verdad en Colombia web-seriea proiektatuko dute Palmera Monteron, 17:30ean. Emigrados Sin Fronteras elkarteak egindako bederatzi ataleko dokumentalak agerian uzten ditu Kolonbiako lider sozialek eta giza eskubideen aldeko ekintzaileek jasaten dituzten mehatxuak eta hilketak.
Eta beste aldetik, datorren asteazkenean, urriak 21, Bidezko Merkataritzako txokolate dastaketa egingo dute Esku Hartze Komunitarioko aretoan, 17:00etan. ADECO elkarteak antolatutako 45 minutuko saioan txokolatearen ezaugarriak eta kakaoaren ekoizpen baldintzak erakutsiko dituzte.
