Bigarren porrota berdezkoentzat
Añorgaren aurka jokatu du asteburuan Hondarribia Futbol Elkarteko lehen taldeak, eta 3-2 galdu. Ion Arza bigarren entrenatzaileak argi du talde donostiarrak ederki jokatzen duela bere zelai berezian.
Hondarribia Futbol Elkarteko gizonezkoen lehen taldeak bi derrota jasan ditu jarraian. Ederki hasi zuten denboraldia, baina Oriokoren aurkako partiduaz geroztik, behera doaz. Oraindik partidu asko dituzte aurretik, eta gora joateko aukerak hortxe daude, baina horretarako aste osoko lana findu beharko dute berdezkoek. Añorgaren aurka galdu zuten larunbatean. Partidu zaila zuten aurretik, jakinekoa baita Añorgaren zelaia berezia dela, duen tamaina txikiarengatik, baina batez ere aurreko urtean maila bat gorago zegoelako Donostiako taldea.
Ezin hobe hasi zen Hondarribia, partidua hasi eta berehala lehen gola sartuz. Michel aurrelariak sartu zuen lehenengoa, Ion Arza taldeko bigarren entrenatzaileak HITZAri azaldu dionez azeri moduan jokatuz, atezainari presio indartsua eginez eta azkenean berak bakarrik baloia atean sartuz. “Aurrerago haiek gailendu ziren. Ongi dakite haien zelaian nola jokatu, eta bigarren jokaldi ia guztiak beraientzako ziren. “Haien momentu horretan sartu ziguten haien lehen gola, eta etenaldira banakakoarekin joan ginen”, azaldu du Arzak.
Bigarren zatian baina, berriro Michelek berdezkoak aurreratu zituen. “Arocenak ordura arte ez genuen etenaldia eman zigun jokoan, erdigunean baloiarekin nagusituz. Hegalera mugitu zuen baloia, Ander Plazarekin jolastuz, eta zazpigarren zenbakiak arearen erdira pasa zuen baloia, horrela Michelek atea garbi zuela gola sartuz”, gehitu du bigarren entrenatzaileak. 1-2a markagailuan zegoela, partidua lasaitu egin zen, eta ez zen inor nagusitu. Halere, Hondarribiko atezainak eragindako penalti batek berdindu zuen partidua, Añorgakoek ez baitzuten huts egin 11 metroetatik.
Azkenean, 77. minutuan sartu zuen hirugarren gola Añorgak. “Hirugarrena jasotzerakoan ez genuen jakin nola erantzun, eta ez ginen partidura itzuli. Partidua oso nekaturik amaitu genuen”, esan du Arzak. Laburbilduz, bigarren entrenatzaileak argi du Añorgako taldeak ederki jokatzen duela bere zelaian, eta hori dela haien indargunea.
Lesakakoak aurrean
Goikoek ez zuten huts egin, eta Beasain B, Oiartzun eta Zarautz taldeek ez dute oraindik porrota ezagutu. Zortzigarren kokatu da orain Hondarribia, bi garaipen, bi porrot eta berdindutako bat edukiz. Asteburu honetan etxean jokatuko du Hondarribiko taldeak, Beti Gazte talde lesakarraren aurka.
