Zorizko joko eta kirol apustuetatik ihesean
Ostegunetik igandera bitarte, zorizko jokoen eta kirol apustuen arriskuei aurre hartzeko ihes jokoa antolatuko dute, San Juan plazan.
Zorizko jokoek eta kirol apustuek dituzten arriskuak oso nabarmenak dira gizartean. Azken urteetan, ikerketek diotenez gero eta gazte gehiago murgiltzen dira joko hauetan. Ludopatia. Dirua jokoan dago, eta arriskuak ere hor daude. Arrisku horiez kontzientziatzeko eta hausnarketaren zein lankidetzaren bidez lantzeko A90 Grados enpresak ihes joko bat antolatuko du ostegunetik, hilak 15, igandera bitarte San Juan plazan.
Ludopatiak ondorio kaltegarri ugari ditu pertsonen bizitza pertsonal, sozial, finantziario eta emozionalean. Adikzio patologikoari aurre egiteko jolasak kamioi baten barruan landuko dituzte 14 urtetik gorako gazteek talde txikietan. Formatu honek ikaskuntza aktiboa, elkarlana eta elkarrizketa sustatuko ditu, proba parte hartzaileen bitartez.
Jolasetarako txandak antolatuko dituzte lau egunetan, goizez eta arratsaldez. Lehenengo bi egunetan, soilik arratsaldez irekita egongo da kamioia; hain zuzen, ostegunean 16:15etik 21:30era, eta ostiralean, 16:15etik 22:15era. Astebururako ordutegia luzatuko dute. Larunbatean 11:30etik 14:30era eta 17:00etatik 22:15era zabalik egongo da. Igandea izango du azken eguna hirian, eta kasu honetan hiritarrek 11:00etatik 14:00etara eta 16:15etik 20:45era jolastu ahalko dute.
Jarduera doakoa izango da. Txandak, ordea, erreserbatu beharko dituzte interesdunek kamion bertan dagoen QR kodearen bidez edota udal webgunearen bidez. Tokirik egotekotan, erreserbarik egin gabe jolasteko aukera izango dute.
