Hilean behin kontsumo arduratsua eta jasangarriari buruz arituko dira
Abendura bitarte, kontsumoaren gainean sentsibilizatzeko eta kontzientziatzeko bi hitzaldi eta Bidashopeko elkartekideentzako tailer bat antolatuko dute.
Beste urte batez, Irungo Udalak kontsumoaren gaineko sentsibilizazio eta kontzientziazio kanpaina egiteko bi hitzaldi eta enpresentzako tailer bat antolatuko du. Jarduera hauek Kontsumitzailearen Informaziorako Udal Bulegoaren eta Bidasoko Kontsumitzaile eta Erabiltzaileen Elkartearen lankidetzan antolatuko dituzte. Guztira hiru jarduera izango dira, eta abendura bitarte, hilean behin, kontsumoa izango dute hizketagai. Hitzaldietarako sarrera doakoa izango da, aretoa bete arte.
Honekin, herritarren kontsumoa jasangarria, arduratsua eta segurua izatea nahi dute euren egunerokoan barneratua izan dezaten. “Gure hirian jendeak kontzientzia hartzea eta kontsumo segurua sustatzea nahi dugu, horregatik hitzaldi eta tailer praktiko hauek norabide horretan bideratuta daude”, adierazi du Sandra Caballerok, Kontsumoko ordezkariak.
Lehenengo hitzaldia hilaren 21ean izango da, Belaskoeneako Adinekoen Espazioan, 17:30etik 19:00etara. Bertan, adinekoei zuzendutako hitzaldia eskainiko dute erosketak modu seguruan eta arduratsuan egiteko hainbat aholku azalduz. Bigarren hitzaldia, berriz, abenduaren 2an egingo dute Palmera Monteron. Kasu honetan, interneten bidez segurtasunez erosteko arriskuak azalduko dituzte; alegia, klik egin aurretik kontuan hartu behar dena. Hitzaldia 18:00etan hasiko da, eta ordu eta erdi iraungo du.
Tartean, azaroaren 19an, Bidasoko Kontsumitzaile eta Erabiltzaileen Elkarteak Bidashop merkatarien elkarteko kideei zuzendutako tailerra antolatuko du, Serapio Mujika kaleko Commerce Lab txokoan. Bezeroekiko harremanean eskubide eta betebeharrak izenburupean, kontsumoarekin lotutako zenbait gai lantzeko moduak azalduko dizkie dendariei.
